کوئی جوہری ہتھیار نہیں

جوہری ہتھیار انسانیت اور ہمارے سیارے کے لیے ایک سنگین اور بڑھتا ہوا خطرہ  ہیں۔  انہیں فوری طور پر ختم کرنے کی ضرورت روز بروز بڑھ رہی ہے۔

کوئی جوہری ہتھیار نہیں

دنیا کے بیشتر ممالک اس مقصد کے لیے پختہ عزم رکھتے ہیں اور انہوں نے تاریخی جوہری ہتھیاروں کی ممانعت کے معاہدے میں شمولیت اختیار کی ہے، جو 2021 میں نافذ ہوا۔

لیکن نو ممالک، بین الاقوامی اصولوں اور اپنے شہریوں کی خواہشات کے برخلاف، اب بھی بڑے پیمانے پر تباہی پھیلانے والے خطرناک ہتھیار اپنے پاس رکھتے ہیں۔ ہر سال وہ اپنے اسلحہ خانوں کو جدید بنانے اور بڑھانے پر اربوں ڈالر ضائع کرتے ہیں۔

جوہری ہتھیاروں کی ایک خطرناک دوڑ جاری ہے، اور جوہری ہتھیاروں کے استعمال کا خطرہ — چاہے جان بوجھ کر ہو یا حادثاتی اتفاقی طور پر — آج اتنا ہی زیادہ ہے جتنا پہلے کبھی تھا۔ ہم ہر وقت عالمی تباہی سےصرف ایک غلط فیصلے کی دوری پر ہیں

حکومتوں کو جوہری ہتھیاروں کو فوری طور پر ختم کرنے کے لیے کارروائی کرنی چاہیے تاکہ ان بے مثال تباہی کو روکا جا سکے جس کے لیے وہ بنائے گئے تھے۔ یہی واحد ضمانت ہے کہ ان کا مزید استعمال اور تجربات نہ ہوں۔

لیکن یہ تب ہی ممکن ہوگا جب دنیا بھر کے لوگ اٹھ کھڑے ہوں اور عملی اقدام کا مطالبہ کریں۔

دنیا کے بدترین ہتھیار

ہیروشیما اور ناگاساکی

ایٹمی تجربات کی میراث

آج کے دور میں ایٹمی ہتھیار

خاتمے کے حق میں دلیل

جوہری ہتھیاروں پر پابندی

خاتمے کے لیے اقدامات

اس مہم کے بارے میں

دنیا کے بدترین ہتھیار

جوہری ہتھیار اب تک بنائے گئے سب سے زیادہ تباہ کن، اندھا دھند اور غیر انسانی ہتھیار ہیں۔ ایک بم اتنا طاقتور ہے کہ پورے شہر کو تباہ کر سکتا ہے، جس میں ہلاکتوں کی تعداد کروڑوں نہیں تو لاکھوں تک ضرور پہنچ جاتی ہے۔

انٹرنیشنل کمیٹی آف دی ریڈ کراس نے جوہری ہتھیاروں کو "اپنی تباہ کن طاقت میں منفرد، انسانوں کو پہنچنے والی ناقابلِ بیان تکلیف میں بے مثال … اور ماحول، آنے والی نسلوں بلکہ خود انسانیت کی بقا ہی کے لیے خطرہ" قرار دیا ہے۔

جوہری ہتھیاربڑی مقدار میں تابکاری خارج کرتے ہوئے، ہوا، زمین، پانی اور ہمارے جسموں کو آلودہ کرتے ہیں، یہ قومی سرحدوں کے پار اور کئی نسلوں تک نقصان پہنچاتے ہیں۔

جب تک یہ موجود ہیں، اس بات کا حقیقی خطرہ موجود رہے گا کہ انہیں دوبارہ استعمال کیا جائے گا، اور اس کے نتائج تباہ کن ہوں گے — یہاں تک کہ ان ممالک کے لوگوں کے لیے بھی جن کا اس تنازع سے کوئی تعلق نہیں ہوگا جس میں یہ استعمال کیے جائیں گے۔

گیس ماسک گاما تابکاری سے کوئی تحفظ فراہم نہیں کرتے۔ کریڈٹ: رِکی پٹمین

جوہری ہتھیار کے اثرات

حرارت

جب ایک جوہری ہتھیار پھٹتا ہے تو یہ شدید حرارت خارج کرتا ہے دھماکے کی مرکزی جگہ کے قریب تقریباً ہر چیز اور ہر شخص فوراً راکھ اور بخارات میں تبدیل ہو جاتا ہے۔

ایک بڑا آگ کا گولہ، جس کا مرکزی درجہ حرارت دس لاکھ ڈگری سیلسیس سے بھی زیادہ ہوتا ہے، آسمان کی طرف بلند ہوتا ہے، جبکہ زمین کی سطح کا درجہ حرارت کئی ہزار ڈگری تک پہنچ جاتا ہے — جو سورج کی سطح سے بھی زیادہ گرم ہوتا ہے۔

یہ شدید حرارت وسیع علاقے میں آگ بھڑکا دیتی ہے، جو زہریلا دھواں اور جلنے والی گیسیں فضا میں چھوڑتی ہیں اور مل کر ایک عظیم آگ کے طوفان کی شکل اختیار کر لیتی ہیں۔

حتیٰ کہ وہ لوگ جو دھماکے کی مرکزی جگ سے درجنوں کلومیٹر دور ہوتے ہیں شدید اور جان لیوا جھلساؤ کا شکار ہوتے ہیں، جبکہ اس سے بھی زیادہ فاصلے پر موجود افراد تیز روشنی کی چمک سے بینائی کھو بیٹھتے ہیں۔

دھماکہ

جوہری ہتھیار ایک نہایت طاقتور اور تیز رفتار بلند دباؤ والی ہوا کی دیوار بھی پیدا کرتا ہے جسے شاک ویو کہا جاتا ہے، جو کئی کلومیٹر تک باہر کی طرف پھیلتی ہے۔

یہ لوگوں کو فضا میں اچھال دیتی ہے، انہیں بے ہوش کر دیتی ہے، ان کے جسموں کو چیر پھاڑ دیتی ہے اور ان کے پھیپھڑوں کو تباہ کر دیتی ہے۔

وسیع علاقے میں عمارتیں مکمل طور پر زمین بوس ہو جاتی ہیں اور بہت سے لوگ دب کر ہلاک ہو جاتے ہیں۔ ڈھیلی اشیاء فضا میں میزائل کی طرح اچھالی جاتی ہیں۔

یہاں تک کہ کنکریٹ اور فولاد سے بنی بلند و بالا عمارتیں بھی اس دھماکے کی شدت سے تباہ ہو جاتی ہیں۔

تابکاری

جوہری سلسلہ رد عمل، جو دھماکے کا سبب بنتا ہے، بڑی مقدار میں آئنائزنگ تابکاری خارج کرتا ہے، جو انسانوں کے جسموں میں گہرائی تک داخل ہو کر ان کے خلیات کوتباہ کر دیتی ہےیا نقصان پہنچاتی ہے اور بیماریوں کا سبب بنتی ہے۔

دھماکے کی مرکزی جگہ سے کئی کلومیٹر کے فاصلے پر بھی لوگوں کو اتنی زیادہ تابکاری ملتی ہے کہ وہ شدید تابکاری زہر (ایکیوٹ ریڈی ایشن پوائزننگ) سے ہلاک ہو سکتے ہیں۔

اس کی علامات میں قے، مسوڑھوں سے خون آنا، اسہال اور بالوں کا جھڑنا شامل ہیں۔ زیادہ تر متاثرہ افراد حملے کے چند ماہ کے اندر ہی وفات پا جاتے ہیں۔

کچھ لوگ بیماری کے ابتدائی مرحلے سے تو صحت یاب ہو جاتے ہیں، لیکن سالوں یا حتیٰ کہ دہائیوں بعد کینسر اور دیگر بیماریوں سے مر جاتے ہیں، جو تابکاری کے دیرپا اثرات کی وجہ سے ہوتی ہیں۔

کچھ زندہ بچ جانے والوں میں کروموسوم کی بے قاعدگیاں اور دیگر جینیاتی نقصانات دیکھے جاتے ہیں، جو آئندہ نسلوں تک منتقل ہو سکتے ہیں۔

تابکار ذرات کی بارش 

جوہری ہتھیار ایک بہت بڑا کھمبی نما بادل بھی پیدا کرتا ہے، جو تابکار گرد و غبار اور ملبے کو اوپر کی طرف کھینچ کر فضا میں چھوڑ دیتا ہے۔

ہوائی دھارائیں اسے فضا میں پھیلا دیتی ہیں، اور بالآخر یہ ایک وسیع علاقے میں زمین پر گرنے لگتا ہے۔

اسے تابکار ذرات کی بارش یا فال آؤٹ کہا جاتا ہے، یہ دھماکے کی مرکزی جگہ سے دور رہنے والے لوگوں کے لیے بھی فوری اور طویل مدتی صحت کے خطرات پیدا کرتا ہے۔ کچھ تابکار اجزاء کئی سالوں تک خطرناک رہتے ہیں اور مٹی، پانی اور خوراک کو آلودہ کر دیتے ہیں۔

برقی مقناطیسی لہر

اگر کسی جوہری ہتھیار کا دھماکا بہت زیادہ بلندی پر کیا جاتا ہے تو یہ ایک طاقتور برقی مقناطیسی لہر خارج کرتا ہے، جو وسیع علاقے میں الیکٹرانک آلات کو تباہ کر دیتا ہے۔ موبائل مواصلاتی نظام، انٹرنیٹ کی صلاحیتیں اور بینکنگ ٹیکنالوجی شدید طور پر متاثر اور درہم برہم ہو جاتی ہیں۔

یہ اثر سب سے پہلے فضائی اور بلند فضا میں کیے جانے والے جوہری تجربات کے دور میں دیکھا گیا تھا۔ 1962 میں جب امریکہ نے بحر الکاہل میں جانسٹن ایٹول سے تقریباً 400 کلومیٹر اوپر خلا میں ایک جوہری ہتھیار کا تجربہ کیا تو اس کے اثر سے ہوائی میں اسٹریٹ لائٹس اور فونز کو نقصان پہنچا، جو 1,450 کلومیٹر سے زیادہ فاصلے پر واقع تھے۔

ایک بہت زیادہ طاقتوراور بلند فضا میں کیا جانے والا جوہری دھماکہ پورے براعظم کے الیکٹرانک نظام کو تباہ کرسکتا ہے۔

امریکی ریاست نیواڈا میں ایک فرضی گھر پر کیے گئے جوہری تجربے کے دھماکے کے اثرات۔ کریڈٹ: امریکی حکومت

بچوں کے لیے زیادہ خطرہ

شیر خوار بچے اور بچے جوہری ہتھیاروں کے اثرات کے لیے خاص طور پر زیادہ حساس اور کمزور ہوتے ہیں۔

بالغوں کے مقابلے میں ان کے جھلسنے (برنز) سے مرنے کا امکان زیادہ ہوتا ہے، کیونکہ ان کی جلد زیادہ پتلی اور نازک ہوتی ہے؛ دھماکے کے زخموں سے بھی زیادہ خطرہ ہوتا ہے، کیونکہ ان کے جسم نسبتاً کمزور ہوتے ہیں؛ اور شدید تابکاری سے ہونے والی بیماری کا خطرہ بھی زیادہ ہوتا ہے، کیونکہ ان کے جسم میں ایسے خلیات زیادہ ہوتے ہیں جو تیزی سے بڑھتے اور تقسیم ہوتے ہیں۔

وہ گر جانے والی اور جلتی ہوئی عمارتوں سے خود کو نکالنے یا بعد کے حالات میں اپنی بقا کے امکانات بڑھانے کے لیے دیگر اقدامات کرنے کی بھی کم صلاحیت رکھتے ہیں۔

سن 1945 میں ناگاساکی پر امریکی ایٹمی بمباری کے بعد ایک بچہ جھلسنے کے زخموں کا علاج کرا رہا ہے۔ کریڈٹ: یاسُو تومیشیگے

جوہری سردی اور قحط

 جوہری ہتھیار اب تک بنائے گئے وہ واحد آلات ہیں جن میں زمین پر موجود تمام پیچیدہ جانداروں کو تباہ کرنے کی صلاحیت موجود ہے۔

اگر ان میں سے ایک سو یا اس سے زیادہ جوہری ہتھیار شہروں کے خلاف استعمال کیے جائیں تو اس کے نتیجے میں پیدا ہونے والے آتش طوفانوں سے اٹھنے والی کالکھ اور دھواں پورے کرہ ارض کو ڈھانپ لے گا اور ایک دہائی سے زیادہ عرصے تک سورج کی روشنی کو روک دے گا، جس سے عالمی درجہ حرارت میں شدید کمی واقع ہوگی — اس اثر کو جوہری سردی کہا جاتا ہے۔

اندھیرے میں ڈوبی ہوئی دنیا میں ایسی سردی پیدا ہو جائے گی جو آج کے گرم اور استوائی علاقوں  کو برفیلے علاقوں میں بدل دے گی۔ خوراک کی فصلیں تباہ ہو جائیں گی اور عالمی زرعی پیداوار منہدم ہو جائے گی، جس کے نتیجے میں وسیع پیمانے پر قحط اور معاشرتی انحطاط ہوگا۔

متعدی بیماریوں کی وبائیں اور قلیل وسائل پر تنازعات عام ہو جائیں گے۔ پہلے ہی غذائی قلت کا شکار افراد سب سے زیادہ موت کے خطرے میں ہوں گے۔

یہاں تک کہ نام نہاد "محدود" جوہری جنگ — جس میں عالمی جوہری ہتھیاروں کا ایک چھوٹا سا حصہ استعمال ہو — یہ بھی دنیا کی بڑی آبادی کو بھوک کے خطرے سے دوچار کر دے گی۔

ایسی جنگ اوزون کی تہہ کو شدید نقصان پہنچائے گی، جس سے بعض اقسام کے کینسر میں نمایاں اضافہ ہوگا اور سمندری حیات کو تباہ کن نقصان پہنچے گا۔ بہت سی نباتاتی اور حیوانی انواع کو معدومیت کا سامنا کرنا پڑے گا ، اور کرہ ارض کو ہونے والا نقصان ناقابلِ تلافی ہوگا۔

عالمی موسمیاتی اثرات

متعدد جوہری ہتھیار استعمال کیے جاتے ہیں۔

کا لکھ اور دھواں سورج کی روشنی کو روکتا ہے۔۔

عالمی درجہ حرارت میں شدید کمی واقع ہو جاتی ہے۔

زرعی پیداوار مکمل طور پر تباہ ہو جاتی ہے۔

لاکھوں لوگ بھوک سے مر جاتے ہیں۔

نقل مکانی اور معاشی تباہی

جوہری جنگ میں، فال آؤٹ کے اثرات سے متاثر ہونے والے لاکھوں لوگ اپنے گھروں کو چھوڑ کر ہمسایہ ممالک میں جانے پر مجبور ہو جائیں گے، انہیں فوری طور پر رہائش، غیر آلودہ خوراک اور پانی، اور طبی سہولیات کی ضرورت ہوگی۔ پناہ کے متلاشی افراد کی تعداد تاریخ میں بے مثال ہوگی۔

متعدد جوہری ہتھیاروں کے استعمال سے بین الاقوامی تجارت اور ٹیلی کمیونیکیشن کا نظام بھی شدید طور پر متاثر ہوگا، اور ممکن ہے کہ عالمی معاشی نظام مکمل طور پر تباہ ہو جائے، جس سے غربت میں مزید اضافہ ہوگا اور انسانی ترقی کے اہداف دہائیوں پیچھے چلے جائیں گے۔

کوئی بھی ملک اور کوئی بھی فرد ان ممکنہ اثرات سے محفوظ نہیں ہے۔

ہیروشیما اور ناگاساکی

اگست 1945 میں جب امریکہ نے جاپان کے ہیروشیما اور ناگاساکی شہروں پر دو نسبتاً چھوٹے جوہری بم گرائے تو ڈھائی لاکھ سے زائد افراد ہلاک ہوئے — یہ جنگ میں جوہری ہتھیاروں کا پہلا اور واحد استعمال تھا۔

بہت سے لوگ فوراً جل کر راکھ ہو گئے۔ دیگر افراد شدید جھلسنے، دھماکے کے زخموں اور شدید تابکاری بیماری کے باعث گھنٹوں، دنوں یا ہفتوں بعد اذیت میں مبتلا ہو کر ہلاک ہوئے۔ بے شمار افراد برسوں بعد بھی تابکاری سے متعلق کینسر اور دیگر بیماریوں سے مر گئے ۔

اس طرح کےہولناک مظالم کی تکرار کو روکنے کے لیے، اقوام کو جوہری ہتھیاروں کے خاتمے کے لیے فوری طور پر کارروائی کرنی چاہیے۔

ہیروشیما اور ناگاساکی میں تباہی کے مناظر قیامت خیز تھے: اسکولوں کے صحن مردہ اور مرتے ہوئے بچوں سے بھرے ہوئے تھے۔ مائیں اپنے بے جان بچوں کو گود میں لیے بیٹھی تھیں۔ لوگوں کی آنتیں باہر لٹک رہی تھیں اور ان کے اعضاء سے جلد کی پٹیاں ادھڑی ہوئ  تھیں۔

زیادہ تر متاثرین اپنی تکلیف کو کم نہیں کر سکے اور وہ  بغیر کسی طبی امداد کےہی مر گئے، کیونکہ صرف چند ہسپتال ہی کھڑے رہ گئے تھے۔ ، طبی سامان تباہ ہو چکا تھا، اور زیادہ تر ڈاکٹر اور نرسیں ہلاک یا زخمی ہو چکے تھے۔ جو لوگ بعد میں ان شہروں میں امداد کے لیے داخل ہوئے تھے وہ بھی باقی ماندہ تابکاری کے باعث اپنی جان کو خطرے میں ڈال بیٹھے

متاثرین کی بہت بڑی اکثریت – 90 فیصد سے زیادہ – عام شہری تھے، جن میں ایک اندازے کے مطابق 38,000 بچے بھی شامل تھے۔ ہیروشیما پر حملے کے وقت، تقریباً 8,400 جونیئر ہائی اسکول کے طلبا باہر کھلے آسمان کے نیچے شہری دفاع کے اقدام کے طور پر آگ بھڑکا رہے تھے۔ ان میں سے 6,300 مارے گئے۔

ہیروشیما کے کھنڈرات۔ کریڈٹ: امریکی حکومت

ہیروشیما پیس میموریل میوزیم میں ایک نمائش۔

گراؤنڈ زیرو

ہر شہر میں، وہ لوگ جوگراؤنڈ زیرو کے کے سب سے قریب یعنی ہائپو سینٹر میں تھے– ان کے زندہ بچنے کے امکانات نہ ہونے کے برابر تھے۔ تقریباً ہر وہ شخص جو 1.2 کلومیٹر کے دائرے میں تھا اور بم کے اثرات سے محفوظ نہیں تھا، فوراً یا چند ہفتوں کے اندر مر گیا۔

ہائپو سنٹر پر زمین کا درجہ حرارت 3,000 سے 4,000 ڈگری سیلسیس تک پہنچ گیا، جبکہ 3.5 کلومیٹر کے فاصلے تک موجود لوگ بھی جھلسنے کا شکار ہوئے۔ طاقتور شاک ویو یعنی جھٹکے کی لہروں نے 2 کلومیٹر کے دائرے میں لکڑی کی زیادہ ترعمارتوں کو تباہ کر دیا۔

یہاں تک کہ 1 کلومیٹر کے فاصلے پر بھی لوگوں کو اتنی زیادہ آئنائزنگ تابکاری ملی کہ وہ شدید تابکاری زہر سے ہلاک ہو گئے۔ بہت سے لوگ اس سے کہیں زیادہ فاصلے پر بھی تابکاری کے دیرپا اثرات کے باعث بعد میں مر گئے۔

بعد کی صورتحال

بمباری کے بعد مچی افراتفری میں، والدین نے اپنے بچوں کو اور بچے اپنے والدین کو بے تابی سے تلاش کرتے رہے۔  کچھ کو اپنے پیاروں کی صرف جلی ہوئی باقیات یا ذاتی اشیاء ملیں ۔ جبکہ بعض کو ان کا کوئی نام و نشان تک نہیں ملا۔ 

خاندان کے افراد کو دوبارہ ملانے کی کوششیں اس حقیقت کی وجہ سے مزید مشکل ہو گئی تھیں کہ بہت سے لوگ اتنے شدید زخمی ہو چکے تھے کہ انہیں پہچاننا تقریباً ناممکن ہو گیا تھا

"کچھ دیر بعد، میں نے ہوائی حملے کی پناہ گاہ سے باہر جھانکا۔ میں نے لوگوں کو کھیل کے میدان میں ہر طرف بکھرا ہوا پایا۔ زمین تقریباً مکمل طور پر لاشوں سے ڈھکی ہوئی تھی۔ ان میں سے زیادہ تر مردہ معلوم ہوتے تھے اور ساکن پڑے تھے۔ تاہم، یہاں وہاں کچھ لوگ اپنی ٹانگیں جھٹک رہے تھے یا اپنے بازو اٹھا رہے تھے۔

– فوجیو تسوجیموتو،عمرپانچ سال، ناگاساکی

کچھ متاثرین کے جسم پر کسی قسم کے ظاہری زخم یا نشان نہیں تھے، لیکن وہ اچانک بیمار ہو کر مر گئے۔ ان کی موت نے ابتدائی امدادی کارکنوں کو حیرت میں ڈال دیا، کیونکہ وہ اس بات سے بے خبر تھے کہ ایک نئے قسم کا ہتھیار استعمال ہوا ہے جس کے مہلک اور تابکار اثرات ہیں۔

شہروں میں بہت سی حاملہ خواتین کا اسقاطِ حمل ہو گیا یا انہوں نے ایسے بچوں کو جنم دیا جو بچپن میں ہی وفات پا گئے، کیونکہ بموں کی تابکاری ان کے رحم تک پہنچ چکی تھی۔ رحم کے اندر تابکاری کے اثرات سے متاثر ہونے والے بچوں میں پیدائشی نقائص، بشمول مائیکروسیفالی عام تھے۔

ناگاساکی حملے کے ایک ماہ بعد۔ کریڈٹ: امریکی حکومت

ناگاساکی میں ایک لڑکا حملے کے بعد راشن کا کھانا حاصل کر رہا ہے۔ کریڈٹ: یوسُوکے یاماہاتا

شِنچی کی سہ پہیہ سائیکل

ہیروشیما پر حملے کے وقت، تین سالہ شنیچی ٹیٹسوتانی اپنے گھر کے باہر وہ کام کر رہا تھا جو اسے سب سے زیادہ پسند تھا – اپنی سہ پہیہ سائیکل کی سواری۔

وہ شدید زخمی ہوا، جس میں اس کے پورے جسم پر جھلسنے کے زخم شامل تھے، اور چند گھنٹوں بعد وہ مر گیا۔ اس کی دو بہنیں، میچیکو اور یوکو بھی اس حملے میں ماری گئیں۔

ان کے والد نے برسوں بعد کہا: “ایسا کبھی بھی بچوں کے ساتھ نہیں ہونا چاہیے۔ براہِ کرم ایک پُرامن دنیا بنانے کے لیے کام کریں جہاں بچے دل کھول کر کھیل سکیں“۔

شِنچی کی جلی ہوئی سہ پہیہ سائیکل اب ہیروشیما پیس میموریل میوزیم میں مستقل طور پر نمائش کے لیے رکھی گئی ہے، اور اس کی بنیاد پر بنایاگیا ایک مجسمہ جنیوا میں انٹرنیشنل ریڈ کراس اینڈ ریڈ کریسنٹ میوزیم میں موجود ہے۔

یہ چیز جوہری حملوں میں بچوں کی تکلیف کی ایک دل دہلا دینے والی علامت بن چکی ہے۔

کریڈٹ: ہیروشیما پیس میموریل میوزیم، نوبوؤ تیتسوٹانی کے عطیہ کردہ۔

ہیروشیما کی بہنیں

جب ہیروشیما پر حملہ کیا گیا تو دو سالہ کیمینو وا تاؤکا اور اس کی پانچ سالہ بہن ہیرونو اپنے والدین کے ساتھ گھر پر تھیں۔ یہ چاروں مارے گئے۔

ایک اور بہن، کایوکو، جو گراؤنڈ زیرو کے قریب موجود تھی، وہ بھی مرگئی۔ صرف سب سے بڑی بہن، چِزوکو، زندہ بچ پائی۔

خیال کیا جاتا ہے کہ کِمینو (بائیں) اور ہیرو نو (دائیں) کی یہ تصویر ایٹمی بمباری سے صرف ایک دن پہلے لی گئی تھی۔ کریڈٹ: میہو ایواتا

بم کی تابکاری سے متاثر

ہیروشیما کی تباہی کے وقت تورو ایکیموتو سات سال کا تھا اور اس کی بہن آئیکو نو سال کی تھی۔ دونوں گھر کے اندر، مرکزِ دھماکہ (ہائپو سینٹر) سے تقریباً ایک کلومیٹر کے فاصلے پر تھے ۔

حملے کے چار یا پانچ دن کے اندر ان کے بال جھڑنے لگے اور انہیں بخار اور مسوڑھوں سے خون آنے کی شکایت ہوئی — یہ شدید تابکاری زہر (ایکیوٹ ریڈی ایشن پوائزننگ) کی علامات تھیں۔

اگرچہ دونوں بیماری کے شدید مرحلے سے صحت یاب ہو گئے تھے، لیکن بالآخر وہ تابکاری کے تاخیری اثرات کا شکار ہوگئے۔ تورو کا 11 سال کی عمر میں اور ایکو کا 29 سال کی عمر میں انتقال ہو گیا۔

بہن بھائی تورو (بائیں) اور آئیکو (دائیں) اکتوبر 1945 میں ہیروشیما ریڈ کراس ہسپتال میں۔ کریڈٹ: شنکِچی کیکوچی

زندہ بچ جانے والے

وہ لوگ جو اتفاقاً ہیروشیما اور ناگاساکی پر ایٹمی بمباری سے بچ گئے، انہیں جاپانی زبان میں "ہیباکوشا"، یا "دھماکے سے متاثرہ افراد" کہا جاتا ہے ۔

بہت سے لوگوں نے اپنی چوٹوں کے باعث ساری زندگی درد اور تکلیف برداشت کی، اس کے ساتھ ساتھ ذہنی صدمے کا بھی سامنا کیا۔ کچھ کے جسم اور چہرے پر موٹی زخموں کی بافت (داغ) بن گئی، جبکہ کچھ لوگ دہائیوں تک اپنے جسم میں گہرائی تک پیوست شیشے کے ٹکڑوں کے ساتھ زندہ رہے۔

خواتین کو خاص طور پر مشکلات اور سماجی بدنامی کا سامنا کرنا پڑا، کیونکہ یہ خدشہ تھا کہ بموں سے ہونے والا جینیاتی نقصان ان کے بچوں اور پوتوں تک منتقل ہو سکتا ہے۔

حملوں کے چند ہی سالوں میں، تابکاری کے تاخیری اثرات کے باعث زندہ بچ جانے والوں میں کینسر اور دیگر بیماریوں کی شرح غیر معمولی طور پر بڑھ گئی۔ ابتدائی برسوں میں خاص طور پر خون کا سرطان (لیوکیمیا) عام تھا۔

دنیا کو ایٹمی ہتھیاروں کے خطرات سے آگاہ کرنے کے لیے، بہت سے زندہ بچ جانے والوں نے 1945 میں پیش آنے والے واقعات کی اپنی ذاتی گواہیاں عوام کے سامنے پیش کیں۔ ان میں سے کچھ لوگ جو اس وقت بچے تھے، آج بھی زندہ ہیں اور سچ بیان کرنے کا یہ کام جاری رکھے ہوئے ہیں۔

ان کا پیغام دہائیوں سے واضح اور مستقل رہا ہے: ایٹمی ہتھیار اور انسانیت ایک ساتھ موجود نہیں رہ سکتے۔

سال امن انعام سے نوازا گیا 2024 میں زندہ بچ جانے والوں کی نمائندگی کرنے والی تنظیموں کی ایک جاپانی کنفیڈریشن نیہون ہیدانکیو کو "جوہری ہتھیاروں سے پاک دنیا کے حصول کے لیے اپنی کوششوں اور گواہی کے ذریعے یہ ثابت کرنے کے لیے کہ جوہری ہتھیاروں کو دوبارہ کبھی استعمال نہیں کیا جانا چاہیے" کے نوبل ۔

زندہ بچ جانے والوں کی جرات مندانہ اور بے دریغ انداز کی وکالت نے دنیا بھر میں بہت سے لوگوں کو جوہری ہتھیاروں کے خاتمے کی تحریک میں شامل ہونے کی ترغیب دی ہے۔

ایک زندہ بچ جانے والا اور حامی

سومی ترو تانیگوچی کی عمر 16 سال تھی جب وہ ناگاساکی جوہری حملے میں مرنے سے بچ گئے تھے انہوں نے بیان کیا : دھماکے کی چمک کے ساتھ میں سائیکل سے ہوا میں اچھل گیا اور زور سے زمین پر جا گرا۔  

جب انہوں نے اپنا سر اٹھایا تو دیکھا کہ وہ بچے جو چند لمحے پہلے ان کے اردگرد کھیل رہے تھے، اب مر چکے تھے۔

ہائپو سینٹر سے تقریباً 2 کلومیٹر دور ہونے کے باوجود، ان کی پیٹھ ، بائیں بازو اور بائیں ٹانگ شدید جھلس گئی۔ ان کے زخم جلد ہی انفیکشن کا شکار ہو گئے، اور وہ تقریباً چار سال تک ہسپتال میں زیرِ علاج رہے، جن میں 21 ماہ تک انہیں پیٹ کے بل لیٹنا پڑا۔

ان کی چوٹوں کا درد کبھی ختم نہیں ہوا۔ انہوں نے اپنی زندگی کا بڑا حصہ ایٹمی ہتھیاروں کے خاتمے کے مقصد کے لیے وقف کر دیا۔

سومیترُو تانِگُچی 1946 میں لی گئی اپنی ایک تصویر کو دیکھ رہے ہیں، جس میں ان کی پیٹھ پر ناگاساکی بم کے نشانات واضح ہیں۔ کریڈٹ: یُریکو ناکاؤ

ایٹمی تجربات کی میراث

اپنی ایٹمی قوتوں کی تباہ کاری اور مہلکیت کو بڑھانے اور اپنے مخالفین کو خبردار کرنے کے لیے، ایٹمی ہتھیار رکھنے والے ممالک نے 1945 کے بعد سے دنیا بھر میں 2,000 سے زیادہ ایٹمی تجرباتی دھماکے کیے ہیں۔

فضا اور سمندروں میں بڑی مقدار میں تابکاری خارج کرتے ہوئے، ان زہریلے تجربات نے کینسر اور دیگر دائمی بیماریوں کی وباؤں کو جنم دیا۔ تجرباتی مقامات بند ہونے کے کئی دہائیوں کے بعد بھی زمین کے وسیع علاقے رہائش کے لیے غیر محفوظ ہیں۔

امریکہ کی ریاست نیو میکسیکو میں، ہیروشیما اور ناگاساکی پر ایٹمی بمباری سے صرف تین ہفتے پہلے، امریکی حکومت نے دنیا کا پہلا ایٹمی تجرباتی دھماکہ کیا جسے "ٹرینیٹی" کا خفیہ نام دیا گیا۔ اس کے عظیم آتش گولے نے ریت کو شیشے میں تبدیل کر دیا، اردگرد کے پہاڑوں کو روشن کر دیا اور تابکار ملبے کا ایک مشروم نما بادل 12 کلومیٹر بلندی تک فضا میں بھیج دیا۔

اس کے نتائج تجرباتی مقام پر کام کرنے والوں اور قریبی آبادیوں کے لیے تباہ کن تھے — اور آج تک محسوس کیے جا رہے ہیں۔

اسی طرح کے اثرات دنیا بھر میں 60 سے زیادہ دیگر ایٹمی تجرباتی مقامات پر کام کرنے والے یا ان کے قریب، یا ہوا اور پانی کے بہاؤ کے راستے میں رہنے والے لوگوں پر بھی پڑے ہیں، جن میں آسٹریلیا اور الجیریا کے صحرا سے لے کر قازقستان کے میدانوں اور بحرالکاہل کے جزائر تک شامل ہیں۔

ایروجی کیبینلی، عمر 13 سال، 1954 میں جب امریکہ نے مارشل جزائر میں جوہری ہتھیار کا تجربہ کیا تو وہ تابکاری سے جلنے کے زخموں کا شکار ہوئے۔ کریڈٹ: امریکی حکومت

جوہری تجربے کے دھماکے سے اٹھنے والا مشروم بادل۔ کریڈٹ: امریکی حکومت

ایٹمی تجرباتی مقامات

ایٹمی ہتھیاروں کے تجربات الجزائر، آسٹریلیا، چین، بھارت، قازقستان، کیریباتی، ماوہی نوئی (فرانسیسی پولینیشیا)، مارشل جزائر، شمالی کوریا، پاکستان، روس، ترکمانستان، یوکرین، ریاستہائے متحدہ امریکہ اور ازبکستان میں کیے گئے ہیں۔

فضائی ایٹمی تجرباتی دھماکے — جن میں سے 500 سے زیادہ 1945 سے 1980 کے درمیان کیے گئے — خاص طور پر نقصان دہ ثابت ہوئے، کیونکہ انہوں نے تابکار ذرات کو دور دور تک پھیلا دیا۔ ان کی مجموعی تباہ کن طاقت 29,000 ہیروشیما بموں کے برابر تھی۔

آج، ہر زندہ انسان کے جسم میں فضائی تجربات سے پیدا ہونے والے تابکار مادے موجود ہیں، جو بیماریوں کے خطرے میں اضافہ کرتے ہیں۔ معالجین کے مطابق، وقت کے ساتھ ساتھ یہ ماضی کے تجربات کم از کم چالیس لاکھ  قبل از وقت اموات کا سبب بنیں گے، جو کینسر اور دیگر بیماریوں کی وجہ سے ہوں گی۔

پانی کے اندر اور زیرِ زمین کیے گئے ایٹمی تجرباتی دھماکوں کے بھی صحت اور ماحول پر طویل مدتی اثرات مرتب ہوئے ہیں۔

بیسویں صدی کے آخری نصف میں، ایٹمی تجربات کے اثرات کے بارے میں عالمی تشویش نے دنیا کے کئی حصوں میں بڑے پیمانے پر احتجاجی تحریکوں کو جنم دیا، جس کے نتیجے میں رہنماؤں نے 1963 میں جزوی پابندی اور 1996 میں مکمل پابندی پر مذاکرات کیے۔ ان دونوں اقدامات نے عالمی سطح پر ایٹمی تجربات کو روکنے میں مدد دی۔

لیکن ماضی کے ان تجربات کے اثرات انسانوں کی زندگیوں اور زمین کے نازک ماحولیاتی نظام پر آئندہ نسلوں تک محسوس کیے جاتے رہیں گے۔ عالمی برادری کی ذمہ داری ہے کہ نہ صرف یہ یقینی بنایا جائے کہ ایسی تباہی دوبارہ کبھی نہ ہو، بلکہ پہلے سے ہونے والے نقصان کے ازالے کے لیے بھی کام کیا جائے۔

دنیا بھر میں ایٹمی تجربات سے متاثر ہونے والے بہت کم لوگوں کو ان کی تکلیف کا معاوضہ ملا ہے، اور سابقہ تجرباتی مقامات کی صفائی کی کوششیں نہایت ناکافی رہی ہیں۔ کچھ مقامات پر خستہ حال بنیادی ڈھانچہ مزید آلودگی کے مسلسل خطرے کا باعث بنا ہوا ہے۔

سن 1971 میں موروُروا ایٹول (ماؤہی نوئی) میں ایک فرانسیسی جوہری تجرباتی دھماکہ۔ کریڈٹ: فرانسیسی حکومت

قازقستان میں روسی جوہری تجربے کے دھماکے سے بننے والا گڑھا۔ کریڈٹ: سی ٹی بی ٹی او (CTBTO)

تابکار نسل پرستی

نسل پرستانہ نظریات اکثر ایٹمی تجربات سے متعلق فیصلوں کی بنیاد رہے ہیں، جن میں حکومتیں اور نوآبادیاتی طاقتیں مقامی (انڈیجنس) لوگوں کو قابلِ قربانی سمجھتی تھیں اور ان کی مقدس زمینوں کو بے وقعت اور “دور افتادہ” تصور کرتی تھیں۔

آسٹریلیا سے تعلق رکھنے والی ایک یانکونیتجاتجارا انانگو خاتون کارینا لیسٹر نے 2017 میں اقوام متحدہ میں قبائلی گروہوں کے اتحاد کی نمائندگی کرتے ہوئے گواہی دی: “ہماری زمین، ہمارا سمندر، ہماری برادریاں اور ہمارے جسمانی وجود ان مہلک تجربات کی میراث کو اپنے ساتھ اب بھی لیے ہوئے ہیں، اور یہ آنے والی نامعلوم نسلوں تک جاری رہے گی۔”

انہوں نے کہا کہ “زیادہ سے زیادہ مہلک بڑے پیمانے پر تباہی پھیلانے والے ہتھیاروں” کی تلاش میں حکام نے مقامی لوگوں کو “تجرباتی جانور” (گنی پگ) کی طرح استعمال کیا۔ ان کی رضامندی شاذ و نادر ہی لی گئی، اور اگر لی بھی گئی تو وہ حقیقی معنوں میں آزادانہ نہیں تھی، جبکہ انہیں تحفظ بھی تقریباً کبھی فراہم نہیں کیا گیا۔

ایٹمی تجربات کی زہریلی میراث نے کئی برادریوں کو ان کے روایتی طرزِ زندگی سے محروم کر دیا ہے۔ وہ اپنے آبائی مقامات پر واپس نہیں جا سکتے اور نہ ہی زمین اور پانی سے اپنی صدیوں پرانی زندگی کے مطابق گزر بسر کر سکتے ہیں۔

ایٹمی تجربات کی زہریلی میراث کا مطلب یہ ہے کہ بہت سی کمیونٹیز اپنے روایتی طرز زندگی سے منقطع ہو چکی ہیں، وہ نہ تو اپنے آبائی مقامات پر واپس جا سکتی ہیں اور نہ ہی زمین اور پانی سے اپنی زندگی بسر کر سکتی ہیں جیسے وہ صدیوں سے کرتی آ رہی تھیں۔

آسٹریلیا: بم نے اندھا کر دیا

سال 1953 میں، جب یامی لیسٹر کی عمر 10 سال تھی، برطانیہ نے آسٹریلوی آؤٹ بیک کے ایمو فیلڈ میں ان کے گھر کے قریب جوہری تجربات کرنا شروع کر دیے۔

انہیں یاد تھا کہ تابکار ملبہ، یا “کالا دھواں”، آسمان کو بھر دیتا تھا۔ اس سے ان کی آنکھوں میں جلن ہونے لگی اور چار سال کے اندراندر وہ اپنی بینائی مکمل طور پر کھو بیٹھے۔

انہوں نے یاد کرتے ہوئے کہا: “میں دوسرے بچوں کے ساتھ کھیل رہا تھا۔ پھر وہ بم پھٹا۔ مجھے اس کی آواز یاد ہے، ایک عجیب سی آواز، نہ بہت اونچی، نہ ایسی جیسی میں نے پہلے کبھی سنی ہو۔ اسی وقت زمین بھی لرز رہی تھی؛ ہمیں پورا علاقہ ہلتا ہوا محسوس ہوا۔”

چند ہی گھنٹوں کے اندر ان کی برادری کے تمام لوگ بیمار ہو گئے۔ انہوں نے کہا: “ہم سب کو الٹیاں ہو رہی تھیں، ہمیں اسہال، جلدی دانے اور آنکھوں میں درد تھا۔ کچھ بزرگ لوگ مر بھی گئے۔”

یامی بعد میں آسٹریلیا کی ان مقامی قبائلی برادریوں کی جانب سے ایک نمایاں رہنما اور وکیل بن گئے، جو ان تجربات کے نتیجے میں متاثر ہوئی تھیں۔ 2017 میں ان کی وفات کے بعد ان کے بچوں نے انصاف کی اس جدوجہد کو جاری رکھا ہوا ہے۔

کریڈٹ: جَیسی بوئلان

قازقستان: ایک فنکار جو بغیر بازوؤں کے پیدا ہوا

کاریپبیک کویوکوف قازقستان کے گاؤں یگندی بُلاک میں پلے بڑھے، جو سیمی پالاتنسک کے قریب واقع ہے— سیمیپالاتنسک سوویت یونین کا سب سے بڑا جوہری تجرباتی مقام تھا ۔ انہوں نے یاد کیا کہ اپنے بچپن میں جب بھی کوئی جوہری تجرباتی دھماکہ ہوتا تھا تو فرنیچر اور برتن ہلنے لگتے تھے۔

ان کی پیدائش سے پہلے، ان کے والدین اپنے گھر کے قریب ایک پہاڑی پر چڑھ جاتے تھے تاکہ آسمان پر بلند ہونے والے روشن اور وسیع مشروم نما بادلوں کو بہتر طور پر دیکھ سکیں۔

انہوں نے سوچتے ہوئے کہا: “انہیں اس وقت ان کے خلاف کیے جا رہے ان جرائم کے صحت پر پڑنے والے خطرات اور تباہ کن نتائج کا کوئی علم ہی نہیں تھا۔

کاریپبیک 1968 میں بغیر بازوؤں کے پیدا ہوئے۔ اپنی جسمانی مشکلات کے باوجود، وہ ایک مشہور فنکار بن گئے۔ وہ اپنے پاؤں اور منہ کی مدد سے مصوری کرتے ہیں۔ ان کی بہت سی فن پارے جوہری ہتھیاروں کے خلاف پیغام دیتے ہیں۔

انہوں نے کہا: “اس زمین پر میرا بنیادی مشن یہ ہے کہ میں اپنی پوری کوشش کروں تاکہ مجھ جیسے لوگ ایٹمی تجربات کے آخری متاثرین ہوں۔ میں نہیں چاہتا کہ دنیا کے کسی بھی حصے یا کسی بھی وقت ان واقعات کا دوبارہ اعادہ ہو… ہمارا آسمان صاف ہو اور ہمارے بچے صحت مند ہوں۔

سن 1949 سے 1989 تک، سوویت یونین نے سیمی پالاتنسک میں 450 سے زیادہ جوہری تجرباتی دھماکے کیے، جو دنیا بھر میں ہونے والے تمام تجربات کا تقریباً چوتھائی حصہ تھے۔

کَریپبیک کُیوکوف کے فن پاروں میں سے ایک، جس کا عنوان ہے “خوف”۔

مارشل جزائر: تابکار مرجانی جزیرے

نیرجے جوزف سات سال کی تھیں جب 1954 میں ریاستہائے متحدہ نے اپنی تاریخ کا سب سے بڑا جوہری تجرباتی دھماکہ، کیسل براوو، مارشل جزائر کے رونگلاپ ایٹول میں ان کے گھر سے تقریباً 160 کلومیٹر کے فاصلے پر کیا۔

یہ دھماکہ توقع سے کہیں زیادہ بڑا تھا اور اس نے بہت زیادہ آلودگی پھیلائی۔ آسمان نارنجی اور گلابی رنگ کا ہو گیا۔ ایٹول کے کسی بھی باشندے کو معلوم نہیں تھا کہ کیا ہوا ہے۔

چند گھنٹوں بعد تابکار راکھ اور مرجان کے ذرات ان کے گھروں پر برسنے لگے، جس سے ان کی جلد، پانی اور خوراک آلودہ ہو گئی۔ جلد ہی ان میں شدید تابکاری بیماری کی علامات ظاہر ہونے لگیں۔ 

نیرجے کے بال جھڑ گئے اور ایٹول کے تقریباً سب لوگوں کی طرح وہ بھی جھلسنے کا شکار ہو گئیں۔

کچھ دن بعد امریکی حکام نے رونگیلاپ کے لوگوں کو ایک دوسرے ایٹول پر منتقل کر دیا کیونکہ ان کی صحت کے لیے تابکار اثرات کا شدید خطرہ تھا۔ لیکن تین سال کی بے دخلی کے بعد حکام نے انہیں واپس آنے کی ترغیب دی، کیونکہ وہ باقی ماندہ تابکاری کے صحت پر ہونے والے اثرات کا مطالعہ کرنا چاہتے تھے۔

اس وقت ایک امریکی اہلکار نے کہا: “اس قسم کا ڈیٹا کبھی دستیاب نہیں ہوا۔ اگرچہ یہ سچ ہے کہ یہ لوگ مغربی یا مہذب لوگوں کی طرح نہیں رہتے، لیکن یہ بھی حقیقت ہے کہ یہ ہم سے چوہوں کی نسبت زیادہ مشابہ ہیں۔

رونگیلاپ کے لوگوں کے لیے یہ واپسی تباہ کن ثابت ہوئی۔ کینسر، اسقاط حمل، مردہ پیدائشیں اور پیدائشی نقائص میں اضافہ ہو گیا۔

تابکار آئسوٹوپس کے جمع ہونے کی وجہ سے نیرجے کو اپنا تھائیرائڈ غدود جراحی کے ذریعے نکلوانا پڑا۔ وہ ایٹمی تجربات سے پہلے کے اچھے دنوں کی واپسی کی آرزو کرتی رہیں۔

سن 1946 سے 1958 تک، ریاستہائے متحدۂ امریکہ نے مارشل جزائر میں 67 جوہری تجرباتی دھماکے کیے۔ کیسل براوو اکیلا ہی ہیروشیما پر گرائے گئے بم کے مقابلے میں ایک ہزار گنا زیادہ طاقت رکھتا تھا۔

آج تک پورے مرجانی جزیرے (ایٹولز) رہائش، زرعی پیداوار اور ماہی گیری کے لیے غیر محفوظ ہیں۔

نیرجے جوزف کے بالوں کا جھڑنا اور تابکاری کے باعث ان کے پاؤں پر جلنے کے زخم۔ کریڈٹ: امریکی حکومت

نقصان کے دیگر ذرائع

یورینیم کی کان کنی سے لے کر تابکار فضلہ کو ٹھکانے لگانے تک جوہری ہتھیار بنانے کے دیگر پہلوؤں نے بھی انسانی صحت اور ماحولیات پر تباہ کن اثرات مرتب کیے ہیں۔

یورینیم کی کانوں میں—جہاں جوہری ہتھیار بنانے کا عمل شروع ہوتا ہے—کان کنی کے بعد بچنے والے فضلے (ٹیلنگز) سے تابکار اور کیمیائی آلودگی مٹی اور پانی کے ذرائع میں شامل ہو گئی ہے، جس سے مزدوروں اور قریبی آبادیوں کو نقصان پہنچا ہے۔ دنیا میں کہیں بھی ایسی کوئی کان نہیں ہے جسے کان کنی مکمل ہونے کے بعد پوری طرح صاف کیا گیا ہو۔

تابکار آلودگی ان ایٹمی ری ایکٹروں میں بھی ہوئی ہے جو ہتھیاروں کے لیے پلوٹونیم کی پیداوار میں استعمال ہوتے ہیں۔ مثال کے طور پر برطانیہ کے ونڈ اسکیل نیوکلیئر پاور اسٹیشن میں 1957 میں تین دن تک آگ لگی رہی، جس نے یورپ کے بڑے حصے میں تابکاری کے بادل پھیلا دیے۔ آس پاس کے فارموں کا تمام دودھ ضائع کرنا پڑا۔

دنیا بھر میں بہت سی برادریاں آج بھی اس مسئلے کا سامنا کر رہی ہیں کہ 1945 کے بعد سے بنائے گئے دسیوں ہزار ایٹمی ہتھیاروں سے پیدا ہونے والے وسیع تابکار فضلے کو محفوظ طریقے سے ذخیرہ کیسے کیا جائے۔ یہ فضلہ ہزاروں سال تک خطرناک رہے گا۔

امریکی ریاست ایریزونا میں جوہری ہتھیاروں کے خلاف احتجاج کرنے والے مظاہرین۔ کریڈٹ: جیک کوہن-جوپا

آج کے دور میں ایٹمی ہتھیار

آج نو ممالک کے پاس کئی ہزار ایٹمی ہتھیار موجود ہیں، جو دنیا بھر کے لوگوں کے لیے ایک منفرد وجودی خطرہ پیدا کرتے ہیں۔ ان میں سے سیکڑوں ہتھیاروں کو انتہائی الرٹ حالت میں رکھا جاتا ہے، جو چند منٹوں کے اندر استعمال کے لیے تیار ہوتے ہیں۔

یہ میزائل سائلوز میں، طیاروں میں، اور آبدوزوں میں موجود ہیں جو ہر وقت سمندروں میں گشت کرتی رہتی ہیں۔ ان میں سے کچھ ہتھیار ہزاروں کلومیٹر تک، براعظموں کو عبور کرتے ہوئے اپنے ہدف تک پہنچ سکتے ہیں۔

حقیقت: دنیا کے نو ایٹمی ہتھیار رکھنے والے ممالک کے پاس اس وقت اندازاً [FACT]fact-nuclear-weapons[/FACT] ایٹمی ہتھیار موجود ہیں۔

ان میں سے زیادہ تر ہتھیاروں کی تباہ کن طاقت ایٹمی دور کے آغاز میں ہیروشیما اور ناگاساکی پر گرائے گئے بموں سے کہیں زیادہ ہے۔ سب سے بڑے ہتھیاروں کی طاقت ایک ملین ٹن یا ایک میگاٹن ٹن ٹی این ٹی جیسے روایتی کیمیائی دھماکہ خیز مواد کے برابر ہوتی ہے۔

یہاں تک کہ نام نہاد “ٹیکٹیکل” ایٹمی ہتھیار، جو میدانِ جنگ میں استعمال کے لیے بنائے جاتے ہیں،وہ بھی ہیروشیما بم سے 20 گنا زیادہ تباہ کن طاقت رکھتے ہیں۔

ایک واحد ایٹمی ہتھیاروں سے لیس آبدوز ایک درجن یا اس سے زیادہ بیلسٹک میزائل لے جا سکتی ہے، جن میں سے ہر ایک میں کئی ایٹمی وارہیڈز ہوتے ہیں، اور ان کی مجموعی صلاحیت سو سے زیادہ شہروں کو تباہ کرنے کی ہوتی ہے۔

ایٹمی ہتھیار رکھنے والے ممالک

آج نو ممالک کے پاس ایٹمی ہتھیار موجود ہیں: ریاستہائے متحدہ امریکہ، روس، چین، فرانس، برطانیہ، بھارت، پاکستان، اسرائیل اور شمالی کوریا۔ روس اور امریکہ کے ایٹمی ذخیرے سب سے بڑے ہیں۔

وہ لوگ جو ان فوجی اڈوں کے قریب رہتے ہیں جہاں ایٹمی ہتھیار تعینات کیے گئے ہیں، ایٹمی حملے کا نشانہ بننے یا کسی حادثاتی ایٹمی دھماکے سے نقصان اٹھانے کے خاص طور پر زیادہ خطرے میں ہوتے ہیں۔ حکومتی رازداری کی وجہ سے، ان میں سے کچھ لوگ شاید اس بات سے بھی بے خبر ہوں کہ وہ ان ہتھیاروں کے قریب رہ رہے ہیں۔

زیادہ تر ایٹمی ہتھیار محض ذخیرہ نہیں کیے گئے ہوتے، بلکہ فعال طور پر تعینات ہوتے ہیں — کسی بھی لمحے استعمال کے لیے تیار۔ حکومتیں “جدید کاری” کے نام پر اپنے ایٹمی ہتھیاروں کے ذخیرے کو بڑھانے اور بہتر بنانے کے مہنگے پروگراموں میں مصروف ہیں۔

کچھ ایٹمی ہتھیار رکھنے والے ممالک نئے قسم کے ایٹمی ہتھیار تیار کر رہے ہیں، ان کی ترسیل کے نئے نظام آزما رہے ہیں، اور ممکنہ ایٹمی استعمال سے متعلق اپنے نظریات کو وسعت دے رہے ہیں۔ بظاہر تمام ممالک اپنے ایٹمی ہتھیاروں کو غیر معینہ مدت تک برقرار رکھنے کا ارادہ رکھتے ہیں ۔

سن 2023 میں ایک فوجی پریڈ کے دوران ایک روسی جوہری میزائل دکھایا گیا۔ کریڈٹ: روسی حکومت

امریکی جوہری میزائل ایک میوزیم میں نمائش کے لیے رکھے گئے۔ کریڈٹ: امریکی حکومت

شریکِ جرم ممالک

اگرچہ صرف نو ممالک کے پاس ایٹمی ہتھیار موجود ہیں، لیکن 30 سے زیادہ دیگر ممالک ان کے برقرار رکھنے اور ممکنہ استعمال کی حمایت کرتے ہیں، جس میں کسی اتحادی کے نام نہاد “ایٹمی تحفظی چھتری” کے ذریعے تحفظ کا دعویٰ بھی شامل ہے۔

مثال کے طور پر، شمالی بحرِ اوقیانوس کے معاہدے کی تنظیم (نیٹو) کے تمام رکن ممالک نے عوامی طور پر ایٹمی ہتھیاروں کی حمایت کی ہے۔ ان میں سے کئی ممالک اپنے علاقوں میں امریکی ایٹمی بم بھی رکھتے ہیں — جن میں بیلجیم، جرمنی، اٹلی، نیدرلینڈز اور ترکیہ شامل ہیں — اور انہیں گرانے کے لیے درکار طیارے اور عملہ بھی فراہم کرتے ہیں۔ بیلاروس میں بھی روس کے ساتھ اسی نوعیت کا انتظام موجود ہے۔

کچھ ممالک جوہری اہداف کے تعین کے لیے خفیہ معلومات کا تبادلہ کرتے ہیں، یا جوہری ہتھیاروں سے مسلح جہازوں کو اپنے پانیوں سے گزرنے اور اپنی بندرگاہوں پر لنگر انداز ہونے کی اجازت دیتے ہیں، یا جوہری ہتھیاروں سے لیس طیاروں کو اپنی فضائی حدود میں داخل ہونے اور اپنے ہوائی اڈوں پر ایندھن بھرنے کی اجازت دیتے ہیں۔

ایسی تمام معاونت کی سرگرمیاں ایٹمی خطرات کو برقرار رکھتی ہیں اور تخفیفِ اسلحہ کی کوششوں کو کمزور کرتی ہیں

جرمنی میں مظاہرین اس فوجی اڈے کی ناکہ بندی کر تے ہوئے جہاں امریکی جوہری بم رکھے گئے ہیں۔ کریڈٹ: رالف شلیسینر

پھیلاؤ سے متعلق خدشات

ایٹمی ہتھیار رکھنے والے ممالک کی تخفیفِ اسلحہ میں ناکامی نے اس خطرے کو بڑھا دیا ہے کہ مزید ممالک، یا یہاں تک کہ غیر ریاستی عناصر بھی، کسی دن ایٹمی ہتھیار حاصل کر سکتے ہیں۔ ان کے پھیلاؤ کو روکنے کے لیے تخفیفِ اسلحہ میں پیش رفت انتہائی ضروری ہے۔

اگرچہ جوہری ہتھیاروں کے پھیلاؤ کو روکنے کے لیے اہم اقدامات موجود ہیں، لیکن ان کی مؤثریت کی ضمانت نہیں دی جا سکتی۔ کوئی بھی ملک جو یورینیم کی افزودگی یا استعمال شدہ ایٹمی ایندھن کی دوبارہ پروسیسنگ کے ذریعے پلوٹونیم حاصل کرنے کی صلاحیت رکھتا ہو، نظریاتی طور پر چند ماہ میں ایٹمی ہتھیار تیار کر سکتا ہے۔

جنوبی افریقہ، اسرائیل، بھارت، پاکستان اور شمالی کوریا نے ایسے ہی مراکز اور مواد کے ذریعے ایٹمی ہتھیار حاصل کیے جو بظاہر “پرامن مقاصد” کے لیے تھے، یہ حقیقت ایٹمی توانائی کے پروگراموں میں موجود پھیلاؤ کے خطرات کو نمایاں کرتا ہے۔

صرف چند کلوگرام انتہائی افزودہ یورینیم یا الگ کیا ہوا پلوٹونیم ایک ایٹمی بم بنانے کے لیے کافی ہوتا ہے۔ آج دنیا بھر کے ذخائر میں ایسے مواد کی سینکڑوں ٹن مقدار موجود ہے، اور مزید پیدا کی جا رہی ہے۔ تخفیفِ اسلحہ کی کامیابی کے لیے اس مسئلے کو حل کرنا ضروری ہے۔

خاتمے کے حق میں دلیل

ان ایٹمی ہتھیاروں کے تباہ کن اور ناقابلِ واپسی نقصان سے انسانیت کو محفوظ رکھنے کے لیے، حکومتوں کو فوری طور پر ان کے خاتمے کے لیے کام کرنا چاہیے۔

دنیا بھر کے لوگوں کی جانب سے خاتمے کے مطالبے کے جواب میں اب تک دسیوں ہزار ایٹمی ہتھیار ختم کیے جا چکے ہیں۔ ایک ملک، جنوبی افریقہ، نے اپنے ایٹمی ہتھیار مکمل طور پر ختم کر دیے ہیں؛ جبکہ درجنوں دیگر ممالک نے انہیں حاصل کرنے کے منصوبے ترک کر دیے ہیں۔

سرد جنگ کے عروج کے دوران تقریباً 70,000 ایٹمی ہتھیار موجود تھے، اور عالمی ذخائر میں نمایاں کمی 1980 کی دہائی کے وسط سے 2000 کی دہائی کے آغاز تک حاصل کی گئی۔

تاہم حالیہ برسوں میں وارہیڈز کو ختم کرنے کے پروگرام رک گئے ہیں، اور کچھ ایٹمی ہتھیار رکھنے والے ممالک اب اپنے ذخائر کو غیر معمولی رفتار سے بڑھا رہے ہیں۔ ان میں سے کسی نے بھی مکمل تخفیفِ اسلحہ کا کوئی منصوبہ پیش نہیں کیا ہے۔

لیکن دنیا کے بیشتر ممالک اب بھی ایٹمی ہتھیاروں کی سخت مخالفت کرتے ہیں اور چاہتے ہیں کہ انہیں فوری طور پر ختم کر دیا جائے۔

صرف ان ہتھیاروں کے مزید ممالک میں پھیلاؤ کو روک دینا یا ان کے استعمال کے حالات پر پابندیاں لگانا کافی نہیں ہے۔ چونکہ یہ ہمارے سیارے پر تمام زندگی کے لیے انتہائی سنگین خطرہ ہیں، اس لیے ان کا مکمل خاتمہ ہی واحد حل ہے۔

تنصیب: بم کے خلاف ایک فنکار کریڈٹ: میکی اناگریئس

غیر اخلاقی، غیر قانونی اور غیر جمہوری

جوہری ہتھیار بڑے پیمانے پر موت اور تباہی پھیلاتے ہیں، اور انسانیت کے وجود تک کو خطرے میں ڈال دیتے ہیں۔ سینکڑوں ہزار افراد کی اندھا دھند ہلاکت اور معذوری کو کبھی بھی اخلاقی طور پر درست قرار نہیں دیا جا سکتا۔

جوہری ہتھیاروں کا کوئی بھی استعمال بین الاقوامی قانون کی خلاف ورزی ہوگا اور یہ اعلیٰ ترین درجے کا جنگی جرم تصور کیا جائے گا۔ تباہ کن اثرات رکھنے والے ہتھیار کبھی بھی کسی جائز فوجی یا تزویراتی مقصد کی تکمیل نہیں کر سکتے۔

دنیا بھر میں، حتیٰ کہ جوہری ہتھیار رکھنے والے ممالک میں بھی، رائے عامہ کے جائزے ظاہر کرتے ہیں کہ عوام کی بڑی تعداد ان کے خاتمے کی حمایت کرتی ہے۔ وہ حکومتیں جو جوہری ہتھیاروں کے ذخائر کو بڑھاتی رہتی ہیں، اپنے شہریوں کی خواہشات اور بہترین مفادات کے برخلاف عمل کر رہی ہیں۔

ان خوفناک ہتھیاروں کو ختم کرنے سے ہر ایک کو، ہر جگہ فائدہ ہوگا۔

استعمال کے بڑھتے ہوئے خطرات

آج کے دور میں جوہری ہتھیار کے استعمال کا خطرہ—چاہے حادثاتی طور پر ہو یا جان بوجھ کر—اتنا ہی زیادہ ہے جتنا کبھی رہا ہے، بلکہ اس میں مسلسل اضافہ ہوتا دکھائی دیتا ہے۔

یہ صورتِ حال مختلف عوامل کی وجہ سے ہے، جیسے کہ خراب بین الاقوامی سیکیورٹی ماحول، جوہری ہتھیار رکھنے والے ممالک کے درمیان بڑھتی ہوئی کشیدگی، ان کے جوہری ہتھیاروں کے ذخائر میں اضافہ، اور بین الاقوامی اصولوں اور اداروں کا کمزور ہونا۔

فوجی میدان میں جارحانہ سائبر صلاحیتوں، خودکار ٹیکنالوجیز اور مصنوعی ذہانت کی ترقی اس خطرے کو مزید بڑھا دیتی ہے۔

جوہری ہتھیاروں کو ہائی الرٹ پر رکھنا—یعنی کسی ممکنہ حملے کی وارننگ ملتے ہی چند منٹوں میں استعمال کے لیے تیار رکھنا—ایک نہایت خطرناک عمل ہے۔ جب ایک جوہری میزائل داغ دیا جائے تو اسے واپس نہیں بلایا جا سکتا۔ اسے اپنے ہدف تک پہنچنا ہی ہوتا ہے، چاہے اس کا آغاز غلط معلومات کی بنیاد پر ہی کیوں نہ ہوا ہو۔

جنگ کے دھندلکے میں، رہنما اکثر غیر معقول اور غیر متوقع فیصلے کرنے کے خطرے سے دوچار ہوتے ہیں۔ دباؤ اور افراتفری کی صورتحال میں غلط فہمیوں کے امکانات خاص طور پر زیادہ ہوتے ہیں۔

سرد جنگ کے دوران کئی مواقع پر دنیا ایک مکمل جوہری جنگ کے نہایت قریب پہنچ گئی تھی۔ سب سے بدنام واقعہ 1962 کا کیوبا میزائل بحران تھا، جس میں امریکہ اور سوویت یونین شامل تھے۔

یہ حقیقت کہ 1945 کے بعد سے جوہری ہتھیار کسی جنگ میں استعمال نہیں ہوئے، زیادہ تر اچھی قسمت کا نتیجہ ہے نہ کہ مؤثر انتظام کا۔ اور جلد یا بدیر، ہماری یہ خوش قسمتی ختم ہو جائے گی—اگر اس خطرے کو ختم کرنے کے لیے مؤثر اقدامات نہ کیے گئے۔

ایٹمی بازداریت

ایٹمی ہتھیار رکھنے والے ممالک اکثر اپنے ایٹمی ذخائر کو برقرار رکھنے کے جواز کے طور پر “ایٹمی بازداریت” کے نظریے کا حوالہ دیتے ہیں۔ وہ یہ دلیل دیتے ہیں کہ ان کے ہتھیار صرف اس مقصد کے لیے ہیں کہ دیگر ممالک کو ایٹمی حملہ شروع کرنے سے روکا جائے، اور اس طرح یہ امن اور استحکام میں مدد دیتے ہیں۔

تاہم زیادہ تر ممالک اس منطق کو مسترد کرتے ہیں اور ایٹمی بازداریت کو ایک خطرناک، غلط اور غیر پائیدار سلامتی کا طریقہ سمجھتے ہیں۔ مزید یہ کہ یہ نظریہ اپنی فطرت میں جارحانہ ہے، کیونکہ یہ بڑے پیمانے پر موت اور تباہی کی مسلسل اور قابلِ اعتبار دھمکی پر مبنی ہوتا ہے۔

بازداریت کے حامیوں کے دعووں کے برعکس، دنیا میں ایٹمی ہتھیاروں کی موجودگی نے تنازعات کو نہیں روکا، حتیٰ کہ ایٹمی ہتھیار رکھنے والے ممالک کے خلاف جارحیت کے واقعات بھی پیش آئے ہیں۔ درحقیقت، ایٹمی ہتھیاروں نے کشیدگی کو بڑھا کر اور دباؤ اور بلیک میلنگ کو ممکن بنا کر جنگوں اور تصادم کے امکانات میں اضافہ کیا ہے۔

بازداریت کا نظریہ یہ فرض کرتا ہے کہ ایٹمی ہتھیار ایک جائز اور مطلوبہ ذریعۂ تحفظ ہیں۔ یہ سوچ ان ہتھیاروں کے پھیلاؤ کو فروغ دیتی ہے اور تخفیفِ اسلحہ میں رکاوٹ بنتی ہے۔

حادثات اور غلطیاں

جوہری ہتھیاروں کے دانستہ استعمال کا ہی خطرہ نہیں ہے؛ یہ انسانی غلطی، تکنیکی خرابی، سائبر حملے، غلط سمجھی گئی وارننگز یا کمانڈ اور کنٹرول نظام تک غیر مجاز رسائی کے نتیجے میں بھی پھٹ سکتے ہیں۔

سنہ 1945 کے بعد سے جوہری ہتھیاروں سے متعلق پیش آنے والے متعدد حادثات، نیز وہ واقعات جن میں غلطیوں کی وجہ سے ان کے استعمال کے قریب نوبت آ گئی تھی ، غیر ارادی تباہی کے خطرناک امکان کو ظاہر کرتے ہیں۔

مثال کے طور پر، 1968 میں ایک امریکی طیارہ جو چار جوہری بم لے جا رہا تھا، آگ لگنے کے بعد گرین لینڈ کے قریب گر کر تباہ ہو گیا، جس سے اردگرد کا علاقہ پلوٹونیم سے آلودہ ہو گیا۔ خوش قسمتی سے، اگرچہ دھماکے ہوئے، لیکن کوئی جوہری سلسلہ وار ردِعمل شروع نہیں ہوا۔

سنہ 1995 میں روسی حکام نے ناروے کے ایک سائنسی راکٹ کے اجرا کو غلطی سے امریکی آبدوز سے داغے گئے بیلسٹک میزائل سمجھ لیا۔ روسی صدر نے جوابی حملے کے لیے لانچ کوڈز حاصل کر لیے، مگر آخرکار یہ طے کیا کہ یہ ایک غلط الارم تھا۔

دیگر نہایت تشویش ناک واقعات میں سمندر میں جوہری ہتھیاروں کا گم ہو جانا، جوہری ہتھیاروں سے لیس آبدوزوں کا آپس میں ٹکرا جانا، اُڑتے ہوئے ہنسوں اور بادلوں سے منعکس ہونے والی روشنی کو جوہری وارہیڈ والے میزائل سمجھ لینا، اور ایک عملی کمپیوٹر میں غلطی سے تربیتی ٹیپس کا داخل ہو جانا ہے، جس سے آنے والے جوہری حملے کی فرضی صورت حال پیدا ہو گئی۔

سن 1961 میں، امریکی ریاست نارتھ کیرولائنا میں ایک بمبار طیارے کا ایک بازو ٹوٹ جانے کے باعث دو جوہری بم زمین پر گر گئے۔ اس وقت کے امریکی وزیرِ دفاع رابرٹ مک نامارا نے کہا “سچ مچ محض ایک معمولی اتفاق سے دو تاروں کے آپس میں نہ ملنے کی وجہ سے، ایک جوہری دھماکہ ٹل گیا۔ کریڈٹ: امریکی حکومت

کوئی انسانی ہمدردی پر مبنی ردِعمل نہیں

دنیا میں کہیں بھی کسی ایک بھی جوہری ہتھیار کا استعمال صحت کے نظام کو اس قدر متاثر کر دے گا کہ انسانی ہمدردی پر مبنی مؤثر امدادی ردِعمل ناممکن ہو جائے گا۔

ہسپتال اور فارمیسیاں، آگ بجھانے کا سامان، مواصلاتی اور نقل و حمل کے نظام سب تباہی کے ایک ایسے علاقے میں ملبے کا ڈھیر بن جائیں گے جو کئی کلومیٹر تک پھیلا ہوگا۔

مکمل تباہی کے زون میں، جو کئی کلومیٹر تک پھیلا ہو گا، ہسپتال، فارمیسیاں، آگ بجھانے کا سامان، مواصلاتی اور نقل و حمل کے نظام سب کچھ، ملبے کا ڈھیر بن جائیں گے۔

بیماروں اور زخمیوں کی مدد کرنے کی کوشش کرنے والے افراد بھی بلند سطح کی تابکاری کے خطرے سے دوچار ہوں گے، جس سے ان کی اپنی جانوں کو بھی خطرہ لاحق ہوگا۔

انٹرنیشنل کمیٹی آف دی ریڈ کراس نے بارہا خبردار کیا ہے کہ ایک بھی جوہری ہتھیار کے استعمال کی صورت میں مناسب ردِعمل کی کوئی صلاحیت موجود نہیں، چہ جائیکہ مکمل پیمانے کی جوہری جنگ، اور ایسی صلاحیت کبھی بھی تیار نہیں کی جا سکتی۔

بین الاقوامی ریڈ کراس کمیٹی نے بارہا خبردار کیا ہے کہ ایک بھی جوہری ہتھیار کے استعمال کی صورت میں، مناسب ردِعمل کی صلاحیت موجود نہیں ہے، چہ جائیکہ مکمل پیمانے کی جوہری جنگ ، اور نہ ہی ایسی کوئی صلاحیت کبھی تیار کی جا سکتی ہے۔

اسی طرح، عالمی ادارۂ صحت نے یہ نتیجہ اخذ کیا ہے: "دنیا میں جو بھی طبی خدمات باقی رہ جائیں گی، وہ اس تباہی کو کسی بھی نمایاں حد تک کم نہیں کر سکتیں۔

ہیروشیما کے ایک زندہ بچ جانے والے کی 1945 میں بنائی گئی عکاسی، جس میں ایک امدادی مرکز دکھایا گیا ہے۔ زخمی ایک کے بعد ایک دم توڑ رہے تھے۔ کریڈٹ: فُمی کو یاما اوکا

کیا بنکر مدد کر سکتے ہیں؟

مزید جوہری بنکرز یا تابکاری سے بچاؤ کے شیلٹرز بنانا اس مسئلے کا حل نہیں ہے۔ سرد جنگ کے دوران یہ عام تھے، لیکن یہ شہریوں کو جوہری جنگ میں بقا کے بارے میں ایک غلط احساسِ تحفظ فراہم کرتے ہیں۔

جوہری حملے کی صورت میں اس بات کا امکان بہت کم ہے کہ کسی کو پیشگی وارننگ ملے، اس لیے کسی محفوظ جگہ میں پناہ لینے کا موقع بھی نہیں ہوگا ۔

مزید یہ کہ گراؤنڈ زیرو کے قریب واقع بہت سے بنکرز بھٹیوں میں تبدیل ہو جائیں گے، جس سے اندر موجود تمام افراد ہلاک ہو جائیں گے۔ درحقیقت، کچھ جوہری ہتھیار خاص طور پر اس طرح ڈیزائن کیے گئے ہیں کہ وہ زمین میں گہرائی تک داخل ہو کر بنکرز کو تباہ کر سکیں۔

جو لوگ کسی طرح بروقت بنکر تک پہنچنے اور اس کے اندر زندہ رہنے میں کامیاب بھی ہو جائیں، وہ باہر نکلنے پر ایک خطرناک، تابکار جہنم نما ماحول کا سامنا کریں گے، جہاں بچاؤ کے امکانات نہایت کم ہوں گے۔

وسائل کا ضیاع

ہر سال جوہری ہتھیار رکھنے والے ممالک اپنے جوہری نظام کو بہتر بنانے اور وسعت دینے پر اربوں ڈالر خرچ کرتے ہیں—یہ وہ رقم ہے جو صحت کی سہولیات، تعلیم، غربت میں کمی، اور موسمیاتی بحران سے نمٹنے کے اقدامات پر لگائی جا سکتی ہے۔

کچھ ممالک میں کارپوریشنز جوہری ہتھیاروں کی تیاری اور ترقی میں معاونت کرکے بھاری منافع کماتی ہیں۔ تھنک ٹینکس اور جامعات بھی اس عمل میں شامل ہوتی ہیں اور مالی طور پر فائدہ اٹھاتی ہیں۔

زندگی کے وجود کو خطرے میں ڈالنے والی سرگرمی کو ختم کرنے سے وسائل دوسرے مقاصد کے لیے آزاد ہو جائیں گے، اور کچھ نہایت ذہین سائنسی ذہن ایک زیادہ پرامن دنیا کے قیام میں اپنا کردار ادا کر سکیں گے—بجائے اس کے کہ وہ اپنی افواج کی بڑے پیمانے پر قتل و تباہی کی صلاحیت کو مزید بہتر بنائیں۔

برطانیہ میں زیرِ تعمیر جوہری ہتھیاروں سے لیس ایک آبدوز۔ کریڈٹ: برطانیہ کی حکومت

امن کی راہ میں رکاوٹ

جوہری ہتھیار آج کے کسی بھی سلامتی کے چیلنج سے نمٹنے میں کوئی کردار ادا نہیں کرتے۔ اس کے برعکس، وہ ان میں سے کئی مسائل کو مزید سنگین بنا دیتے ہیں یا خود ان کی بنیادی وجہ ہوتے ہیں۔

جوہری ہتھیاروں کے خاتمے کا حصول اقوام کے درمیان زیادہ ہم آہنگ تعلقات کو ممکن بنائے گا اور بین الاقوامی تعاون کے وسیع مواقع پیدا کرے گا، جس سے دنیا بھر کے لوگوں کو فائدہ ہوگا — خاص طور پر ان ممالک میں بھی جو اس وقت جوہری ہتھیاروں سے مسلح ہیں۔

یہ ایک اعلیٰ درجے کی عالمی عوامی بھلائی ہوگی، جو قومی اور اجتماعی سلامتی دونوں کے مفادات کی خدمت کرے گی۔

یہ قومی اور اجتماعی سلامتی کے مفادات کو پورا کرتے ہوئے، اعلیٰ ترین عوامی بھلائی ہوگی۔

صنفی تنقید

وہ رہنما جو جوہری ہتھیار استعمال کرنے کی آمادگی ظاہر کرتے ہیں، اکثر انہیں مردانہ، طاقتور اور فیصلہ کن کے طور پر سراہا جاتا ہے، جبکہ جو تخفیفِ اسلحہ کی حمایت کرتے ہیں انہیں نسوانی، کمزور اور جذباتی قرار دے کر نظرانداز کیا جاتا ہے۔

مزید یہ کہ جوہری ہتھیاروں سے متعلق عوامی مباحثے اور فیصلہ سازی عموماً مردوں کے زیرِ اثر ہوتی ہے۔

ان تصورات کو فعال طور پر چیلنج کرنا اور صنفی تنوع اور شمولیت کو یقینی بنانا تخفیفِ اسلحہ میں کامیابی کے امکانات کو بہتر بنا سکتا ہے۔

جوہری ہتھیاروں پر پابندی

سنہ 2017 میں، جوہری ہتھیاروں کے خاتمے کے لیے بین الاقوامی مہم اور اس کے شراکت داروں کی ایک دہائی پر محیط جدوجہد کے بعد، 122 ممالک نے دنیا کے بدترین ہتھیاروں کو غیر قانونی قرار دینے کے لیے ایک تاریخی معاہدہ اپنانے کے حق میں ووٹ دیا۔ اسے جوہری ہتھیاروں کی ممانعت کا معاہدہ کہا جاتا ہے۔ یہ 2021 میں نافذ العمل ہوا۔

اس سے پہلے، جوہری ہتھیار ہی واحد وسیع تباہی پھیلانے والے ہتھیار تھے جو کسی جامع اور عالمی سطح پر قابلِ اطلاق پابندی کے تحت نہیں آتے تھے۔ اس طرح یہ نیا معاہدہ بین الاقوامی قانون میں ایک بڑے خلا کو پُر کرتا ہے۔

یہ معاہدہ انسانی بقا، ماحول، سماجی و اقتصادی ترقی، عالمی معیشت، غذائی تحفظ، اور موجودہ و آنے والی نسلوں کی صحت و فلاح کو جوہری ہتھیاروں سے لاحق بڑھتے ہوئے خطرے پر گہری تشویش کے نتیجے میں وجود میں آیا۔

یہ نہ صرف پہلا کثیرالجہتی معاہدہ ہے جو واضح طور پر جوہری ہتھیاروں پر پابندی عائد کرتا ہے، بلکہ یہ پہلا ایسا معاہدہ بھی ہے جو جوہری ہتھیاروں کے قابلِ تصدیق خاتمے کے لیے فریم ورک قائم کرتا ہے اور ان کے استعمال اور تجربات کے متاثرین کی مدد کا بھی انتظام کرتا ہے

حقیقت: اب تک [FACT]fact-ratifications[/FACT] ممالک نے جوہری ہتھیاروں کی ممانعت کے معاہدے کی توثیق کی ہے یا اس میں شامل ہوئے ہیں، جبکہ مزید [FACT]fact-signatories[/FACT] ممالک نے اس پر دستخط کیے ہیں
مزید ممالک کو بھی ان کی پیروی کرنی چاہیے

اگرچہ آج تک کسی بھی جوہری ہتھیار رکھنے والے ملک نے جوہری ہتھیاروں کی ممانعت کے معاہدے میں شمولیت اختیار نہیں کی، تاہم یہ معاہدہ جوہری ہتھیاروں کے استعمال کے خلاف عالمی سطح پر قائم ممانعت کو مضبوط بنانے اور اسلحہ کے خاتمے کے لیے طویل عرصے سے درکار اقدامات کو تیز کرنے کا ایک ناگزیر ذریعہ ہے۔

تاریخ نے یہ ثابت کیا ہے کہ مخصوص اقسام کے ہتھیاروں پر پابندی ان کے خاتمے کی طرف پیش رفت کو آسان بناتی ہے۔ جن ہتھیاروں کو غیر قانونی قرار دے دیا جاتا ہے، انہیں بتدریج غیر قانونی اور ناجائز سمجھا جانے لگتا ہے، ان کی سیاسی حیثیت کمزور پڑ جاتی ہے اور اس کے ساتھ ہی ان کی تعمیر کے لئے درکار وسائل بھی کم ہو جاتے ہیں۔

جنوری 2021 میں جوہری ہتھیاروں کی ممانعت کے معاہدے کا نافذ العمل ہونا ایک غیر معمولی کامیابی تھی اور جوہری ہتھیاروں کے حتمی خاتمے کی جانب ایک قدم تھا۔

  انتونیو گوٹریس، اقوام متحدہ کے سیکرٹری جنرل، 2021

جیسے جیسے وقت کے ساتھ زیادہ سے زیادہ ممالک جوہری ہتھیاروں کی ممانعت کے معاہدے میں شامل ہوتے جائیں گے، اس کے اصول و ضوابط مزید مضبوط ہوں گے، اور جوہری ہتھیار رکھنے والے ممالک پر ان کی پابندی کرنے کا دباؤ بڑھتا جائے گا۔ اب تک دنیا کے نصف سے زیادہ ممالک اس معاہدے میں شامل ہو چکے ہیں۔

یہ ایک ایسی دنیا کے مقابلے میں ایک طاقتور متبادل پیش کرتا ہے جہاں بڑے پیمانے پر تباہی کی دھمکیوں کو غالب آنے دیا جاتا ہے۔ یہ موجودہ تشویشناک بحران کے وقت میں آگے بڑھنے کا ایک راستہ فراہم کرتا ہے۔

سن 2017 میں جوہری ہتھیاروں کی ممانعت کے معاہدے کے لیے اعلیٰ سطحی دستخطی تقریب۔ کریڈٹ: اقوامِ متحدہ کی تصویر

جوہری ہتھیاروں کی ممانعت کے معاہدے کی اہم دفعات

پابندیاں

جوہری ہتھیاروں کی ممانعت کا معاہدہ ممالک کو اس بات سے روکتا ہے کہ وہ کبھی بھی جوہری ہتھیاروں کو تیار کریں، ان کا تجربہ کریں، ان کی تیاری کریں، انہیں حاصل کریں، ذخیرہ کریں، منتقل کریں، استعمال کریں یا ان کے استعمال کی دھمکی دیں۔ انہیں یہ بھی منع کیا گیا ہے کہ وہ اپنی سرزمین پر کسی دوسرے ملک کے جوہری ہتھیار رکھیں، یا دوسروں کو ان سرگرمیوں میں مدد فراہم کریں یا انہیں ترغیب دیں جن پر اس معاہدے کے تحت پابندی عائد کی گئی ہے۔

خاتمے کا فریم ورک

یہ معاہدہ جوہری ہتھیاروں کے پروگراموں اور ان سے متعلقہ تنصیبات کے قابلِ تصدیق اور ناقابلِ واپسی خاتمے کے لیے ایک قانونی فریم ورک قائم کرتا ہے۔ جوہری ہتھیار رکھنے والا کوئی ملک اگر اس معاہدے میں شامل ہوتا ہے تو اسے فوری طور پر اپنے جوہری ہتھیاروں کو عملی حیثیت سے ہٹانا ہوگا اور ایک طے شدہ، مذاکرات کے ذریعے مقرر کردہ وقت کی حد کے اندر (زیادہ سے زیادہ 10 سال میں) انہیں تباہ کرنا ہوگا۔ متبادل طور پر، کوئی ملک معاہدے میں شامل ہونے سے پہلے ہی اپنے جوہری ہتھیار تباہ کر سکتا ہے اور انہیں ایک نامزد بین الاقوامی اتھارٹی کے ذریعے تصدیق کروا سکتا ہے

متاثرین کی مدد اور ماحولیاتی بحالی

یہ معاہدہ ممالک کو اس بات کا پابند بناتا ہے کہ وہ جوہری ہتھیاروں کے استعمال اور تجربات سے متاثر ہونے والے افراد کی مدد کریں، جس میں طبی علاج، بحالی اور نفسیاتی معاونت شامل ہے۔ انہیں ان علاقوں کی بحالی کے لیے بھی اقدامات کرنے ہوں گے جو جوہری دھماکوں کی تابکاری سے آلودہ ہو چکے ہیں۔ ان دفعات پر مؤثر عملدرآمد کے لیے بین الاقوامی تعاون کلیدی حیثیت رکھتا ہے۔

دیگر معاہدوں پر بنیاد رکھنا

جوہری ہتھیاروں کی ممانعت کا معاہدہ نئے ہتھیاروں سے متعلق سابقہ معاہدوں کو تقویت دیتا ہے، جن میں 1968 کا عدم پھیلاؤ کا معاہدہ بھی شامل ہے، جس کا مقصد جوہری ہتھیار رکھنے والے ممالک کی تعداد کو محدود کرنا اور اسلحہ کے خاتمے کے ہدف کو آگے بڑھانا ہے۔

جیسے کہ بین الاقوامی عدالتِ انصاف نے 1996 میں تصدیق کی تھی، ممالک پر یہ قانونی ذمہ داری عائد ہوتی ہے کہ وہ نیک نیتی کے ساتھ ایسے مذاکرات کریں اور انہیں مکمل کریں جو جوہری تخفیفِ اسلحہ کی طرف لے جائیں۔ اس مقصد کی جانب پیش رفت کا فقدان جوہری ہتھیاروں کی ممانعت کے معاہدے کی مذاکراتی عمل کے آغاز کی ایک بڑی وجہ تھی۔"

جوہری ہتھیاروں کی ممانعت کے معاہدے کی اصل کاپی۔ کریڈٹ: بین الاقوامی مہم برائے خاتمۂ جوہری ہتھیار

ممنوعہ ہتھیار

حیاتیاتی ہتھیار – 1972 میں ممنوع قرار دیے گئے

کیمیائی ہتھیار – 1993 میں ممنوع قرار دیے گئے

اینٹی پرسنل بارودی سرنگیں – 1997 میں ممنوع قرار دی گئیں

کلسٹر گولہ بارود – 2008 میں ممنوع قرار دیا گیا

جوہری ہتھیار – 2017 میں ممنوع قرار دیے گئے

مزید ممالک کو شامل کرنا

کسی بھی ملک کے لیے یہ ممکن ہے کہ وہ کسی بھی وقت جوہری ہتھیاروں کی ممانعت کے معاہدے میں شامل ہو جائے۔ جو ممالک فی الحال اس میں شامل ہونے سے ہچکچاتے ہیں، وہ ممکن ہے کہ جیسے جیسے معاہدے کی رکنیت بڑھتی جائے اور ان کے شہریوں کے مطالبات زیادہ زور پکڑیں، اپنی پالیسیوں پر نظرِ ثانی کریں۔

ماضی میں بھی دیگر معاہدوں کے ساتھ بھی ایسا ہو چکا ہے۔ مثال کے طور پر فرانس اور چین نے کی ابتدا میں عدم پھیلاؤ کے معاہدے کی مذاکرات کے دوران مخالفت کی تھی، لیکن دہائیوں کے بعد اس میں شامل ہونے پر مجبور ہوئے۔

دنیا تیزی سے بدل رہی ہے، اور آج کے رہنما ہمیشہ اقتدار میں نہیں رہیں گے۔ مستقبل کی حکومتیں ممکن ہے اس معاہدے کے فوائد کو تسلیم کر لیں، جبکہ موجودہ حکومتیں ایسا نہ کرتی ہوں۔

جو ممالک جوہری ہتھیاروں کی ممانعت کے معاہدے میں شامل ہو چکے ہیں، ان پر یہ ذمہ داری عائد ہوتی ہے کہ وہ دوسروں کو بھی اس میں شامل ہونے کی ترغیب دیں، جس کا حتمی مقصد “عالمگیر شمولیت” ہے۔

اس معاہدے میں شامل ہونا ایک واضح پیغام دیتا ہے کہ جوہری ہتھیار ناقابلِ قبول ہیں اور انہیں ختم کیا جانا چاہیے۔ بڑھتے ہوئے جوہری خطرات کے وقت میں، یہ سب سے خطرناک ہتھیاروں کے خاتمے کی بہترین امید فراہم کرتا ہے۔

آئیے ہم اس معاہدے کے ذریعے فراہم کردہ ان منفرد مواقع سے فائدہ اٹھائیں اور جوہری ہتھیاروں کے دور کا خاتمہ کریں۔

انٹرنیشنل کمیٹی آف دی ریڈ کراس، 2020

سن 2025 میں نیویارک میں جوہری ہتھیاروں کی ممانعت کے معاہدے کے فریقین کا اجلاس۔ کریڈٹ: بین الاقوامی مہم برائے خاتمۂ جوہری ہتھیار

تخفیفِ اسلحہ کرنے والے: جنوبی افریقہ اور قازقستان

جوہری ہتھیاروں کی ممانعت کے معاہدے کے دو نمایاں حامی، جنوبی افریقہ اور قازقستان، نے اپنی ماضی کی کارروائیوں کے ذریعے یہ ظاہر کیا ہے کہ جوہری اسلحے کا خاتمہ ممکن ہے۔

جب 1991 میں سوویت یونین کے خاتمے کے بعد قازقستان نے آزادی حاصل کی تو اس کی سرزمین پر 1,400 سے زائد جوہری ہتھیار موجود تھے۔ اس نے ان سب سے دستبردار ہونے کا فیصلہ کیا، یہ تسلیم کرتے ہوئے کہ اس کی سلامتی بہترین طور پر تخفیفِ اسلحہ کے ذریعے حاصل ہو سکتی ہے۔

جنوبی افریقہ نے بھی 1990 کی دہائی کے آغاز میں اپارتھائیڈ کے دور کے خاتمے پر یہی نتیجہ اخذ کیا، اور رضاکارانہ طور پر اپنے تمام جوہری بموں کے ذخیرے کو ختم کر دیا—ایک ایسا اقدام جس کی بعد میں بین الاقوامی جوہری توانائی ایجنسی نے تصدیق کی۔

دونوں ممالک کے رہنماؤں نے جوہری ہتھیاروں سے پاک دنیا کے قیام میں اپنی شراکت پر فخر کا اظہار کیا اور دوسروں کو بھی اسی راستے پر چلنے کی ترغیب دی۔

جنوبی افریقہ کے جوہری بموں کے خول۔

خاتمے کے لیے اقدامات

جوہری ہتھیار انسانی ہاتھوں سے بنائے گئے ہیں اور انہیں انسانی ہاتھوں سے ہی ختم بھی کیا جا سکتا ہے۔ اس میں کوئی تکنیکی رکاوٹیں نہیں، صرف سیاسی رکاوٹیں ہیں۔ اب تک دسیوں ہزار جوہری ہتھیار پہلے ہی ختم کیے جا چکے ہیں۔

قیادت اور سیاسی عزم کے ساتھ تخفیفِ اسلحہ کی جانب مزید پیش رفت بہت تیزی سے حاصل کی جا سکتی ہے۔ یہ حقیقت کہ دنیا کے بڑے جغرافیائی خطوں کو پہلے ہی جوہری ہتھیاروں سے پاک قرار دیا جا چکا ہے، اس بات کی طرف اشارہ کرتی ہے کہ ایک دن پوری دنیا بھی جوہری ہتھیاروں سے پاک ہو سکتی ہے۔

تاریخی طور پر جوہری اسلحہ کنٹرول کے میدان میں کچھ بڑی پیش رفتیں اس وقت حاصل ہوئیں جب بین الاقوامی کشیدگی عروج پر تھی۔ بحران رہنماؤں کی توجہ مرکوز کرتا ہے اور انہیں نئے راستے تلاش کرنے پر مجبور کرتا ہے۔

لیکن پیش رفت ہمیشہ ایک مضبوط عوامی تحریکِ تبدیلی پر منحصر رہے گی، جس میں ہر طبقۂ زندگی سے تعلق رکھنے والے فکر مند شہری شامل ہوں۔ آج جوہری ہتھیاروں کے استعمال کے خلاف جو مضبوط اور پائیدار عالمی نفرت موجود ہے، وہ دہائیوں پر محیط عوامی مزاحمت کا نتیجہ ہے۔

ایسے بہت سے طریقے ہیں جن سے لوگ دنیا کے بدترین ہتھیاروں کو ختم کرنے میں مدد کر سکتے ہیں۔ ان میں سے کچھ یہ ہیں

ناروے کے شہر اوسلو میں جوہری ہتھیاروں کی ممانعت کے معاہدے کی حمایت میں مشعل بردار جلوس۔ کریڈٹ: کرسٹیان لیملےرف۔

آگاہ کریں

اپنے دوستوں، خاندان کے افراد اور ساتھیوں کے ساتھ جوہری ہتھیاروں کے خاتمے کی فوری ضرورت کے بارے میں معلومات شیئر کریں۔ مضامین اور مدیر کے نام خطوط لکھیں، سوشل میڈیا پر مواد پوسٹ کریں، اور عوامی فورمز، تعلیمی نشستیں اور فلمی نمائشیں منعقد کریں۔

جوہری ہتھیاروں کے انسانوں اور ماحول پر پڑنے والے نقصانات کے بارے میں آگاہی پیدا کرنا خاص طور پر اہم ہے۔ اکثر اوقات جوہری ہتھیاروں کی تعلیم میں ان افراد پر توجہ دی جاتی ہے جنہوں نے 1945 میں یہ ہتھیار ایجاد کیے یا استعمال کیے، بجائے اس کے کہ ان کے تباہ کن اثرات پر غور کیا جائے۔

ہیروشیما اور ناگاساکی کے زندہ بچ جانے والوں کی براہِ راست گواہیاں، اور جوہری تجربات سے متاثر ہونے والے افراد کے تجربات، لوگوں کی سوچ بدلنے اور عملی اقدام کی ترغیب دینے میں مددگار ثابت ہو سکتے ہیں

کاغذی سارَس

جاپان میں کاغذ کے سارَس روایتی طور پر اچھی صحت اور طویل عمر کی علامت سمجھے جاتے ہیں۔ آج کے دور میں انہیں عالمی سطح پر امن کی علامت کے طور پر بھی پہچانا جاتا ہے، اور یہ جوہری ہتھیاروں کے خاتمے کی فوری ضرورت پر اہم گفتگو شروع کرنے کے لیے استعمال کیے جا سکتے ہیں۔

دو سالہ بچی ساداکو ساساکی ہیروشیما پر گرائے گئے بم کی تابکاری سے متاثر ہوئی تھیں۔ کئی سال بعد انہیں لیوکیمیا (خون کا کینسر) کی تشخیص ہوئی — جو تابکاری کا ایک تاخیری اثر تھا — اور انہوں نے ہسپتال میں رہتے ہوئے ایک ہزار کاغذ کے سارَس بنانے کا ہدف مقرر کیا، اس امید میں کہ اس سے انہیں اچھی صحت ملے گی۔

انہوں نے ثابت قدمی دکھائی اور اپنا ہدف حاصل کر لیا، لیکن افسوس کہ وہ دن بہ دن کمزور ہوتی گئیں اور 12 سال کی عمر میں انتقال کر گئیں۔

تب سے، جاپان اور دنیا بھر کے بچے جوہری ہتھیاروں کے خاتمے کی حمایت ظاہر کرنے کے لیے کاغذ کے سارَس بناتے آ رہے ہیں۔

کیوں نہ آپ بھی اپنے ملک کے منتخب نمائندوں کو کاغذ کے سارَس بذریعہ ڈاک بھیجیں یا خود جا کر دیں، اور ساتھ ایک خط شامل کریں جس میں ان سے جوہری ہتھیاروں کی ممانعت کے معاہدے کی حمایت کی درخواست کی جائے؟

ناگاساکی میں ایک یادگار کو ہزاروں کاغذی سارسوں سے سجایا گیا ہے۔ کریڈٹ: بین الاقوامی مہم برائے خاتمۂ جوہری ہتھیار

آواز اٹھائیں

اپنے ملک کے فیصلہ سازوں کو خط لکھیں، فون کریں یا ان سے ملاقات کریں تاکہ ان سے جوہری ہتھیاروں کے مکمل خاتمے کی حمایت حاصل کی جا سکے۔

سال 2017 سے اب تک، مختلف سیاسی نظریات سے تعلق رکھنے والے ہزاروں ارکانِ پارلیمنٹ نے فکرمند شہریوں کے مطالبات کو قبول کرتے ہوئے جوہری ہتھیاروں کے خاتمے کے لیے بین الاقوامی مہم کے عہد نامے پر دستخط کیے ہیں، تاکہ جوہری ہتھیاروں کی ممانعت کے معاہدے کی پاسداری کو فروغ دیا جا سکے۔

واشنگٹن ڈی سی سے لے کر پیرس اور سڈنی تک، سینکڑوں شہروں نے بھی باضابطہ طور پر جوہری ہتھیاروں کے خلاف بین الاقوامی مہم کی اپیل پر دستخط کر کے اس معاہدے کی حمایت کی ہے۔

آپ کو اپنی آواز سنانے کے لیے ماہر بننے کی ضرورت نہیں ہے۔ اہم بات یہ ہے کہ آپ خطرے کی شدت اور کارروائی کی فوری ضرورت کو پہچانتے ہیں۔

ICAN convenes parliamentarians from across the world. Credit: Derek French

احتجاج کریں

عدم تشدد پر مبنی احتجاج لوگوں کے لیے جوہری ہتھیاروں کے خلاف اپنی مخالفت ظاہر کرنے کا ایک اہم ذریعہ ہے۔ یہ مختلف شکلیں اختیار کر سکتا ہے، جن میں جلسے، جلوس، ناکہ بندیاں اور شمع بردار تقاریب شامل ہیں۔

کئی دہائیوں سے عالمی امن اور تخفیفِ اسلحہ کی تحریک سے وابستہ افراد نے اس مقصد کی طرف توجہ مبذول کرانے کے لیے بڑے اور چھوٹے احتجاج کیے ہیں۔ بے شمار اقدامات اُن مقامات پر کیے گئے ہیں جہاں جوہری ہتھیار تیار اور تعینات کیے جاتے ہیں، اُن جامعات میں جو ان کی تیاری میں شامل ہیں، اور قومی پارلیمانوں کے باہر۔

بلاشبہ، بڑے پیمانے پر ہونے والے احتجاجوں نے جوہری تجربات کے خاتمے، جوہری ہتھیاروں کے ذخائر میں اضافے کو روکنے، 1945 کے بعد جنگ میں جوہری ہتھیاروں کے استعمال کو روکنے، اور تخفیفِ اسلحہ کے لیے دباؤ بڑھانے میں مدد دی ہے۔

آج مزید براہِ راست اقدام کی ضرورت ہے۔

آسٹریلیا کے شہر میلبورن میں جوہری ہتھیاروں کے خلاف ایک احتجاجی اقدام۔ کریڈٹ: جَیسی بوئلان

سرمایہ کاری ختم کریں

کچھ جوہری ہتھیار رکھنے والے ممالک میں کمپنیاں جوہری ہتھیاروں اور اُن کے پرزہ جات کی تیاری میں شامل ہیں، جبکہ مالیاتی ادارے اس کام کو ممکن بنانے کے لیے سرمایہ فراہم کرتے ہیں۔

جوہری ہتھیاروں کی صنعت سے سرمایہ نکال لینا ایک عملی قدم ہے جو مالیاتی ادارے تخفیفِ اسلحہ کے لیے اٹھا سکتے ہیں۔ سینکڑوں ادارے پہلے ہی ایسا کر چکے ہیں اور جوہری ہتھیاروں سے پاک مالیاتی نظام کے عزم کا اظہار کر چکے ہیں، جو جوہری ہتھیاروں کی ممانعت کے معاہدے کے مطابق ہے۔

افراد اپنے بینکوں اور پنشن فنڈز سے رابطہ کر سکتے ہیں اور مطالبہ کر سکتے ہیں کہ جوہری ہتھیار بنانے والی کمپنیوں کو اُن کی سرمایہ کاری سے خارج کر دیا جائے۔

اس مہم کے بارے میں

بین الاقوامی مہم برائے خاتمۂ جوہری ہتھیار ایک عالمی اتحاد ہے جو غیر سرکاری تنظیموں پر مشتمل ہے، جس کا مقصد دنیا کے ہر ملک کو جوہری ہتھیاروں کی ممانعت کے تاریخی معاہدے میں شامل ہونے اور اسے مکمل طور پر نافذ کرنے کے لیے قائل کرنا ہے ۔

یہ مہم 2007 میں آسٹریلیا کے شہر میلبورن میں قائم کی گئی تھی اور اسے اُس کامیاب تحریک سے تحریک ملی تھی جس نے ایک دہائی قبل انسانی بنیادوں پر اینٹی پرسنل بارودی سرنگوں پر پابندی لگوائی تھی۔ آج، بین الاقوامی مہم برائے خاتمۂ جوہری ہتھیار کا مرکزی دفتر جنیوا، سوئٹزرلینڈ میں واقع ہے۔

ہمیں ایک پرعزم عالمی تحریک کی ضرورت ہے جو جوہری ہتھیاروں کو غیر قانونی قرار دے کر ختم کرے۔ اس نسل میں اس مقصد تک پہنچنے کے لیے ہمیں عوامی رائے کی لہر کو ایک عظیم اور طاقتو عروج تک پہنچانا ہوگا: ایک بڑی، تیزی سے بڑھتی ہوئی اور ناقابلِ مزاحمت قوت، جو ہمیں مکمل طور پر جوہری ہتھیاروں کے خاتمے تک لے جائے۔ اس کے بغیر، چاہے سب سے زیادہ متاثر کن رہنما ہی کیوں نہ ہوں، وہ بھی راستے میں ڈگمگا جائیں گے۔

بل ولیمز، شریک بانی، بین الاقوامی مہم برائے خاتمۂ جوہری ہتھیار، 2006

کا ایک اقدام۔ کریڈٹ: آود کیٹیمیئل جنیوا میں بین الاقوامی مہم برائے خاتمۂ جوہری ہتھیار

اپنے آغاز سے ہی ICAN نے جوہری ہتھیاروں کے خلاف عوامی سطح پر مضبوط اور وسیع پیمانے پر مخالفت پیدا کرنے پر توجہ مرکوز رکھی ہے۔ اس میں ہیروشیما اور ناگاساکی کے ایٹمی بم کے زندہ بچ جانے والوں اور جوہری تجربات سے متاثر ہونے والے افراد کی آواز کو زیادہ مؤثر انداز میں اجاگر کرنا بھی شامل ہے۔

بین الاقوامی ریڈ کراس کمیٹی، اقوامِ متحدہ کے سیکرٹریٹ اور ہم خیال حکومتوں کے ساتھ مل کر، ICAN نے آگاہی بڑھانے کے لیے تقریبات منعقد کیں، جدید تحقیقی کام شائع کیا، عالمی یومِ عمل کا اہتمام کیا اور براہِ راست اعلیٰ سطح کے فیصلہ سازوں کے سامنے جوہری ہتھیاروں کے خاتمے کے لیے اپنا مؤقف پیش کیا۔

حقیقت: بین الاقوامی مہم برائے خاتمۂ جوہری ہتھیار کی اس وقت [FACT]fact-partner-countries[/FACT] ممالک میں [FACT]fact-partners[/FACT] شراکت دار تنظیمیں موجود ہیں۔

نوبل امن انعام

سن 2017 میں، بین الاقوامی مہم برائے خاتمۂ جوہری ہتھیار کو “اس کے اس کام کے اعتراف میں جس کے ذریعے اس نے جوہری ہتھیاروں کے کسی بھی استعمال کے تباہ کن انسانی نتائج کی طرف توجہ مبذول کروائی اور ایسے ہتھیاروں پر معاہدے کی بنیاد پر پابندی کے حصول کے لیے اس کی انقلابی کوششوں پر” نوبیل امن انعام سے نوازا گیا

ہم پختہ یقین رکھتے ہیں کہ بین الاقوامی مہم برائے خاتمۂ جوہری ہتھیارنے ، گزشتہ سال کے دوران ، کسی بھی دوسرے سے زیادہ، جوہری ہتھیاروں سے پاک دنیا کے حصول کی کوششوں کو نئی سمت اور نئی توانائی فراہم کی ہے۔

نارویجن نوبل کمیٹی، 2017

یہ ان بے شمار مہم چلانے والوں اور فکر مند شہریوں کی انتھک کوششوں کو خراجِ تحسین ہے جو دنیا بھر میں ایٹمی دور کے آغاز سے ہی جوہری ہتھیاروں کے خلاف بلند آواز سے احتجاج کرتے آئے ہیں اور اس بات پر زور دیتے رہے ہیں کہ انہیں ہمیشہ کے لیے ختم کیا جائے۔

یہ کوئی دور کا خواب نہیں بلکہ ایک فوری ضرورت ہے۔ آنے والی نسلوں کو اس خوفناک آفت سے آزاد ماحول میں پروان چڑھنا چاہیے۔

ہیروشیما میں طلبہ کے ساتھ ایک اقدام۔ کریڈٹ: تاکیو ناکاؤکو

ستسوکو تھرلُو

سیٹسوکو تھرلو اس وقت 13 سال کی تھیں۔ وہ ہیروشیما پر گرائے گئے ایٹمی بم کے دھماکے سے بے ہوش ہو گئیں۔ وہ ایک منہدم عمارت کے ملبے میں پھنس گئیں، لیکن آخرکار رینگ کر وہاں سے باہر نکلنے میں کامیاب ہو گئیں۔

انہوں نے یاد کرتے ہوئے کہا: اس عمارت میں میرے زیادہ تر ہم جماعت زندہ جل کر مر گئے تھے۔ میں نے اپنے اردگرد مکمل، ناقابلِ تصور تباہی دیکھی… جلے ہوئے انسانی جسموں کی بدبو فضا میں پھیلی ہوئی تھی۔

ایٹمی جنگ کی ہولناکیوں کی ایک زندہ گواہ کے طور پر، سیٹسوکو نے 2017 میں آئی سی اے این کو دیے گئے نوبیل امن انعام کو مشترکہ طور پر قبول کیا۔ انہوں نے خبردار کیا: “ہر لمحہ، ہر دن، جوہری ہتھیار ہم سب کے پیاروں اور ہماری عزیز ترین چیزوں کو خطرے میں ڈال رہے ہیں۔”

“ہمیں اب اس پاگل پن کو مزید برداشت نہیں کرنا چاہیے۔”

انہوں نے عالمی رہنماؤں پر زور دیا کہ وہ حال ہی میں منظور ہونے والے جوہری ہتھیاروں کی ممانعت کے معاہدے پر دستخط کریں۔ انہوں نے کہا: “یہ جوہری ہتھیاروں کے خاتمے کے آغاز کی ابتدا ہو۔ اس معاہدے میں شامل ہوں؛ اور ہمیشہ کے لیے جوہری تباہی کے خطرے کا خاتمہ کریں۔

سیٹسوکو تھرلو سن 2017 میں ناروے میں نوبیل امن انعام کی تقریب میں۔ کریڈٹ: جو سٹراوبے

آئی سی اے این کی تازہ اطلاعات حاصل کرنے کے لیے رجسٹر کریں

کلیدی الفاظ

جوہری ہتھیار؛ ایٹمی بم؛ ایٹم بم؛ ہائیڈروجن بم؛ تھرمونیوکلیئر ہتھیار؛ بڑے پیمانے پر تباہی کے ہتھیار؛ ہیروشیما؛ ناگاساکی؛ ایٹم بم دھماکے؛ ایٹمی طاقت؛ جوہری ہتھیاروں؛ جوہری ہتھیاروں کے پروگرام؛ ایٹمی ٹیسٹنگ؛ ایٹمی ٹیسٹ سائٹس؛(ICAN) بین الاقوامی مہم برائے خاتمۂ جوہری ہتھیار; ؛ نوبل امن انعام ؛ جوہری ہتھیاروں کی ممانعت پر معاہدہ (TPNW)؛ عدم پھیلاؤ کا معاہدہ (NPT)؛ جوہری ہتھیاروں سے پاک زونز؛ جوہری تخفیف اسلحہ؛ جوہری عدم پھیلاؤ؛ جوہری خاتمے؛ جوہری مخالف تحریک؛ امن سرگرمی تقسیم جوہری خطرات؛ تابکاری جوہری نتیجہ جوہری موسم سرما؛ ہائپو سینٹر کاغذی کرینیں؛ ہیباکوشا مقامی لوگ؛ یورینیم پلوٹونیم جوہری فِشن؛ جوہری فیوژن؛ جوہری فضلہ؛ جوہری میزائل؛ ایٹمی آبدوزیں؛ جوہری حادثات؛ جوہری ڈیٹرنس؛ جوہری اشتراک؛ ایٹمی چھتری

 

بین الاقوامی مہم برائے خاتمۂ جوہری ہتھیار (آئی سی اے این) کے ذریعے سن سال 2026 میں شائع کیا گیا
متن: ٹِم رائٹ
تصاویر: گیبریل سلویرا

اوپر واپس جائیں